我喜歡西班牙菜，徹頭徹尾地愛：坐在氣氛熱鬧的小酒館，先來杯清爽而且滿載菓香的Sangria，或是廉價香檳Cava，讓微醺燃點興奮情緒；想找小食餸酒，款式多、細細碟又不貴的Tapas，就算叫多幾款，肚皮與荷包也負擔不大。人多的話主菜當然叫Paella，享受海鮮燴飯滋味。

西班牙Tapas的魔力近年持續擴散。香港湧現大批供應法國、韓國小食的小酒館，百花齊放，對嗜好杯中物、為食又怕肥的我堪稱福音。這鼓飲食潮流亦吹到澳門，上周朋友聚會，美女成員Cherry告知林茂堂有間小酒館「Wolfpack」，開業大概一年，專賣Tapas，勾起了大家光顧興趣。

 

 

作為小酒館bistro，是否值得常去，第一個考慮都未講到酒水與食物，而是氣氛。「Wolfpack」位處中產區，年青人客路多，聚會當晚雖然並非周五六，去到只係七點，但我到場時地下及閣樓已坐滿人，氣氛熾熱。

坐低點酒水，最初有點失望，賣Tapas竟然不供應Sangria菓酒？幸好這裡的啤酒款式，稱不上多卻揀得夠精，生啤還有大熱的日本品牌Coedo及英國手工啤酒Brewdog，算有誠意。餐牌食物款式不少，我當然先揭去Tapas那幾頁，分凍和熱兩種：凍菜有齊大路的Coldcut火腿、蕃茄凍湯等；熱菜款式較多，蒜片蝦、辣肉腸和各式串燒，齋睇已勾起食慾。

大家放心交給我點菜，當晚我就狂點Tapas。我平時愛叫蒜片蝦，這晚換上串燒蝦頗有驚喜，上菜時中蝦一支支插在木頭裝飾上，侍應拿出火機，燒着伴碟的一撮乾草，一時間火光熊熊，我心想不會要客人拿起支蝦BBQ掛？原來火很快自行熄滅，純粹噱頭，卻成功吸引到其他客人注意，紛紛跟着點菜。蝦燒得鮮甜味美，當然如轉用野生海蝦就更完美。

 

 

當晚另一驚喜是Samosa，港澳食客喜歡稱之為印度咖喱角。我剛剛去完印度，食Samosa食到驚，事關正宗做法外層麵粉皮相當厚身，這樣才夠飽肚，無奈粉纍纍一大嚿實在令我吃不消，始終鍾情港澳地區才找到的細三角形size。「Wolfpack」的Samosa餡料不是咖喱，而是釀入黑毛豬，而且還選用肥豬肉粒，的確又油又香，細細件多吃也不怕膩口。

 

 

朋友們一邊飲酒一邊試Tapas，最尾才點主菜。牛扒份量驚人，無五六個人吃不完，上菜時外籍廚師還親自過來為客人切扒。味道我是有點失望，牛扒雖然經過慢煮才燒，肉質沒有嚡口，但時間掌握得不好，肉汁流失了，變了好像烚牛肉一樣，反觀最簡單常見的燒羊架就做得不俗。本來也想叫Paella，但該店在海鮮燴飯添加我不吃的忌廉，也就沒點。

整體而言，「Wolfpack」的氣氛和Tapas水準我都滿意。執筆之時，剛剛從朋友得知澳門又新開了幾間賣特色小食的小酒館，邀約我下次去試；試過好吃，馬上介紹給各位讀者朋友。

 

閱讀（6106）