兩大猛人的北角回憶

四五十年代的北角，是不少內地商賈遷居香港時的主要落腳地區。《頭條開LIVE》最近和《東周網》聯乘訪問了其中兩位在北角區成長的猛人；包括全國政協常委唐英年，仲有前港鐵主席馬時亨。
唐英年家族是江蘇無錫望族，他的族人和鄉里陸陸續續自上海搬遷到北角聚居，形成一個小上海，好多特色店舖、食肆、娛樂設施等也逐漸發展起來。唐唐話佢記得外公外婆住在北角堡壘街其中一幢唐樓的三樓，要走一段好長的樓梯，所以印象深刻，而他一家就算後來搬到其他地區，亦經常回北角探親，外公會帶他出街玩，去皇都戲院旁邊的玩具店買玩具，仲有坐叮叮由北角到中環，一邊吹涼風一邊睇風景；至於外婆，就會帶他去街市買餸，教他點樣買靚菜，而春秧街這些點點滴滴，都是唐唐美好的童年回憶。

 

 

至於馬時亨，則是典型獅子山下成功故事。小時候家窮，一家擠住美輪大廈板間房的他，無地方溫習只好攞本書落街，一路行一路讀，由書局街行到皇都戲院，再行番轉頭，如是者日日行幾轉，「好多街坊都問我你咁樣溫書得唔得o架？但係屋企細有乜辦法？好處係習慣咗唔使坐低都睇到字，呢家坐船坐車睇文件都唔會頭暈。」刻苦用功經年，終於不負苦心考上心儀的香港大學，人生從此改寫。
馬時亨說，北角是個充滿歷史感的地區，六七年暴動期間，華豐國貨附近一段英皇道便是其中一條戰線，早上，他會被外面直升機巡邏的聲音吵醒，晚上實施宵禁，他要被警察盤問一番才獲放行回家。
「成條街都係防暴警察，所謂菠蘿（炸彈）遍地，就係嗰個位。那年我十五歲，記得某朝早上催淚彈煙味攻到上十樓我的家，好刺鼻，媽媽拉着我立即用水洗眼……」
此外，他印象更深的是家住大廈對面的大牌檔，好多好嘢食，「北角係小上海，好多上海美食，粢飯、小籠包，仲有上海式油炸鬼，比廣東式的大條好多……」滄海桑田，昔日的平民食肆已經拆卸，變成今日的港鐵站。
另一個童年回憶，就是去皇都戲院睇世界盃，「那年代球王比利好紅，但當時邊有直播？皇都戲院會播佢踢世界盃嘅剪輯精華片段，我哋幾個細路就買碌蔗、或者一包栗子入去，一路食一路睇，好似身處現場一樣依嘩鬼叫。」馬時亨話，現時仍然經常去北角，皆因他的教會在那裏，有時又去探吓老友。
想知道兩位猛人更詳盡嘅北角回憶，就Click呢個QR Code入去重溫啦。