為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2020 年 11 月 11 日

黃翊獲何婉盈老遠撐場

資深歌手黃翊,喺大埔街市及熟食中心經營大排檔近十五年,受到新冠肺炎疫情嘅影響,令佢嘅生意大受打擊。為咗疫市求生,佢惟有諗諗計仔,由原本只做晚市小炒,改為朝早開始營業,賣埋車仔麵、碟頭炒粉麵飯,只求收番人工、燈油火蠟嘅成本,維到皮,唔使裁員執笠,夥記個個有工開、有糧出,佢就心滿意足。
日前嘅中午,東姑就發現黃翊現身自己嘅大排檔。喺午市食lunch嘅繁忙時間,佢仲親自落手落腳幫忙樓面嘅工作。由落單、斟茶遞水,以至執嘢抹枱,佢全部一腳踢,冇話「敦」老闆款,認真落力。
期間,東姑又巧遇九一年落選港姐何婉盈。跟黃翊老友鬼鬼嘅佢,家住北角,似係專誠嚟到大排檔幫襯撐場,支持一吓老朋友。何婉盈叫咗碗車仔麵,大啖大啖食,食到津津有味;而黃翊亦非常熱情,親自招呼老友,幫佢落單及上菜,後來更索性坐低敘舊,大家傾偈打吓牙骹,好傾到雞啄唔斷。
其實,疫情之下,黃翊不單止苦撐自己食肆嘅生意,有心有力嘅佢,仲每星期喺網上舉行直播音樂會,希望用歌聲幫樂迷打打氣,發放一吓正能量。每次網上live騷,佢仲邀請唔到嘅朋友做嘉賓,一齊jam歌。其中,識於微時嘅老友何婉盈,都係唱家班,自然走唔甩,亦曾經係黃翊live show嘅座上客,無論幕前幕後都撐老友撐到底,何婉盈認真係義氣仔女喇!

家住北角嘅何婉盈,老遠到黃翊喺大埔經營嘅大排檔,撐老友場,幫襯食車仔麵。

 

身為老闆嘅黃翊,喺午市繁忙時段,落手落腳幫忙大排檔樓面嘅工作。

 

喺大埔經營大排檔接近十五年嘅黃翊,工夫做慣做熟,唔少大埔街坊都係佢嘅熟客仔。