為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2020 年 11 月 10 日

搏一鋪踏出溫室玩《造星III》 葉巧琳享受迫到盡紅星式通告

 

葉巧琳抱住搏一鋪心態參加《全民造星III》,好享受迫到盡如紅星式一樣密集通告。

葉巧琳(Mischa、暱稱阿Mi)入行8年,由3人組合Trekkerz到單飛發展,都先後出過專輯,最近毅然參加ViuTV育星真人騷《全民造星III》。Mischa直言13年加入樂壇開始,一直被公司保護在溫室,今次搏一鋪跳出安全區,雖然過程辛苦,面對自己不擅長的事,迫到盡頭反而看到自己的進步,更笑指好享受每日排到密麻麻如紅星一樣的通告工作。

 

入行8年的Mischa, 好想透過節目畀觀眾睇到她真實的一面。

 

最初跟公司商量參賽時,Mischa曾經猶疑過,「我係驚o架!大家都知呢個節目幾嚴格,我接唔接受到呢啲意見呢!?諗真啲我唔理得咁多,導師嘅指導我會聽,但其他好似網民嗰啲,作為藝人都要接受,總會有人唔鍾意你o架嘛!只要做好自己,就唔使理咁多嘢。」

Mischa坦承入行到現在成績未如理想,唯有拿出大量勇氣去試一次,「真係盡地一煲,搏一鋪,真係講到自己想喊!咁多年一路都好似差啲差啲,就算啲歌有人識又係差啲咁,所以好想透過今次比賽帶番自己啲歌畀大家認識,我目標好想喺節目度唱自己嘅歌,我唔需要贏,但至少認識真實嘅阿Mi囉!以往上台唱首歌或者參加好多音樂騷,但大家冇認識真實嘅我,我諗呢個節目係一個好好嘅平台,畀人睇到我好多唔同嘅一面。」

擅長唱歌的Mischa,自知跳舞是最大弱點。

13年Mischa跟演藝學院音樂系同學袁偉峰Mike(左)和羅健邦Pong組成Trekkerz出道。

好開心畀人鞭策

自知跳舞是弱項的Mischa,在節目催逼下亦覺進步不少,「以前公司會好保護我,好似《水舞間》嗰時跳啲舞係度身訂造,o依家我都可以幾日就學到隻舞,雖然唔係跳得靚,但起碼做到,原來成功係迫到你去到盡頭,喺唔舒服位置嘅時候,你就可以成長,之前我真係溫室長大,好多嘢都就住我情況,o依家好開心畀人鞭策,我8年嚟都太舒服,呢個係個好好嘅成長。」

雖然現在每日排練好忙,但Mischa視為一個訓練過程,會好好享受,「由第一日開始訓練自己做啲唔擅長嘅嘢,我覺得係一個訓練嚟,雖然係辛苦嘅,每日都排滿晒,但係好享受好似做一個紅星嘅生活,每日瞓得幾個鐘,以前就算出歌都唔會咁密集,o依家真係好充實,幾開心幾享受呢個充實,每日朝早7點起身已經好安慰好開心,成件事覺得玩落去係enjoy嘅!」

Mischa最近推出新歌《二人份》,一改以往形象大玩性感。