為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2020 年 11 月 07 日

新華陷困境鍾國頌 屋漏更逢夜雨

旅遊氣泡近在咫尺,但對冰封八個幾月嘅旅遊界無助止血,新華旅遊近日向員工發通告,要求全體三百員工十二月起停薪留職三個月。「新華 」招牌有四十幾年,但甚少人留意到,間公司近年其實已轉手兩次,新老闆鍾國頌係航空界新貴,佢接手「新華」後本來想大展拳腳,點知撞正疫情來襲,可謂人算不如天算。
香港人對鍾國頌或者有啲陌生,查實佢發跡經過充滿傳奇。話說任職中國民航嘅佢由經理做起,起初只係小職員,但憑拚搏快速上位,加上有傳佢同已故海航集團聯合創始人王健嘅舊同學,喺王提拔下,事業如坐火箭般平步青雲。鍾國頌與海航嘅關係千絲萬縷,更被視為海航海外業務嘅「代理人」,幫海航管理多家境外旅遊業務公司,更一度擔任海航旗下香港快運(HK Express)嘅執行董事長,以及海航系旗下兩間旅行社包括康泰旅行社及新華旅遊嘅董事。

曾被視為海航海外業務「代理人」嘅鍾國頌(左二)最終淡出航空界,專注經營新華旅遊業務。

 

面對零收入近一年,新華旅遊要求全體三百名員工停薪留職三個月。

 


不過隨着一八年七月王健喺法國意外離世,大批王健系嘅海航高層短時間內紛紛離開海航,作為王健得力助手嘅鍾國頌,地位亦出現微妙變化。同年八月,鍾國頌突然辭任香港航空董事職務,年底更被海航入稟高等法院,向佢名下嘅香港航空諮詢服務公司追討逾八億元嘅債券欠款,市場當時對海航控告旗下股東感到奇怪,一度惹來海航派內鬥爭疑雲。
呢場鬥爭愈演愈烈,一九年三月,國泰航空斥資四十九億想全購香港快運,但持有部分股權嘅鍾國頌企硬拒賣,批評有關交易繞過股東,仲尋求法律意見,股東之間隨即爆發爭拗甚至鬧上法庭,香港快運賣盤亦受阻。但事件去到七月突然有戲劇性轉機,鍾國頌宣布撤銷訴訟,事件告一段落。有指鍾國頌主動退出訴訟原因,係同海航達成一項「有條件」協議,包括獲海航免除八點五億元債務,海航亦額外向對方支付一億元現金,及總值三億元嘅新華旅行社現金;鍾亦因此淡出航空界,專注新華旅行社嘅業務發展。
可惜無耐爆發反修例風波,來港旅遊嘅內地客大減,今年加埋肺炎疫情,重挫出境團同入境團,「新華」生意大受打擊。公司管理層承認近一年零收入陷嚴重困境,喺惡劣環境下無力應付薪金及租金開支。相信鍾國頌都估唔到,拎到「新華」反而令佢身家縮水,不知是禍定是福嘞。

疫情打擊下,以往遊人以如鯽的尖沙咀廣東道一帶十分冷清。