為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2020 年 11 月 04 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

長期停牌對小股東不利

根據港交所九月底報告,並非因私有化、轉板或自願撤回上市地位而停牌三個月以上嘅主板公司共六十二間,其中十七間已獲港交所通知除牌,但同時正申請覆核除牌決定。我明白有關停牌、除牌機制牽涉大量解釋、編撰資料、審計,甚至訴訟,因此雖然港交所規定主板公司停牌十八個月就可取消上市地位,但實際往往拖延經年,有進入除牌程序第三期嘅公司已停牌十年。
其中極受市場關注嘅康宏環球(1019)二○一七年十二月七日起停牌,至今接近三年,期間不曾公布業績,而且訴訟不斷。今年五月底,港交所根據上市規則第6.01A條決定取消康宏上市地位,但公司已提出覆核除牌請求。
我從事股評工作多年,深明小股東嘅心態和弱勢。康宏三年冇披露業績,嚴重影響小股東權益。例如根據一七年中期報告,公司當時擁有資產淨額近四十八億元(港元,下同),當中八億元為現金,呢啲財產去向係點,只得局內人有所掌握,散戶難以知曉,變相剝奪股東知情權。此外,董事會當時冇報告公司有異常狀況,但喺中期報告發表後幾個月就捲入「謎網風暴」而停牌,多名管理層被拘捕,涉嫌貪污並使公司作出不當股份分配,以及不理性放貸等決定。中報時董事會有冇盡力確保資料無誤?

馬時亨並沒有直接牽涉康宏利益,擁有處理危機和爭議嘅往績, 可以客觀地處理各項棘手議題。

 


事件更觸發股東間爭拗,至今仍有一連串法律訴訟未得以圓滿結案,暫時睇嚟股份復牌無期。今年八月,公司刊發業務營運資料,並概述未來發展計劃,但監管機構五項復牌要求,包括最重要嘅業績公布,則仍未做到。九月二十八日,集團單一最大股東郭曉群要求召開股東特別大會,動議罷免全體現任董事,改為委任馬時亨(Fred)、石禮謙,以及佢本人等共六人入董事會,冀帶領公司滿足復牌要求。
處於除牌階段嘅公司,大部分主要業務已停止運作,甚至正在清盤,因此股東只能寄望除牌前公司能賣出,滿足復牌要求。然而康宏屬於例外,佢哋過去幾年依然不斷擴充理財業務,最新披露公司聘用超過二千名員工,服務四十萬客戶。公司除牌對業務影響有幾大仍係未知之數,牽連嘅除咗小股東,亦包括眾多僱員和客戶嘅利益。公司董事會能否提出有效復牌方案,實在係當前要務。
石禮謙和馬時亨並冇直接牽涉之前嘅爭議,加上佢哋前者係立法會議員,後者係港鐵(0066)前任非執行主席,擁有處理危機和爭議嘅往績,我期望佢哋可以運用多年公職經驗,為小股東爭取權益,並客觀地處理各項棘手議題。
有關任命動議嘅股東特別大會將喺十一月二十六日舉行,小股東應該爭取機會表態,以保衛自身權益。我亦希望監管機構能夠以小股東利益為先,以鞏固投資者對香港股票市場嘅信心。