阿里巴巴（9988）持有三成三股權的全球最大FinTech公司螞蟻科技集團將於本周公開招股。由於各路人馬蓄勢熱搶，螞蟻變成皇帝女唔憂嫁，估值因此愈推愈高。三個月前「只值」一萬五千五百億港元，現時最高估值已飆升至三萬六千億港元，相等於五間滙豐（0005）有多，非常誇張。
螞蟻科技「蟻多摟死象」，原因之一是增長前景遠勝傳統銀行，因此市場願意接受更高估值。集團業務除了廣為人知的支付寶「數碼支付」外，包括理財、借貸、保險、銀行和互聯網大數據的「數字金融」才是大茶飯。有金融業人士將螞蟻比喻為集Apple Pay、PayPal和旗下電子錢包Venmo、Visa、摩根大通、iShares和保險經紀的合體，足以挑戰任何跨國金融集團。
螞蟻IPO炙手可熱，市場估計掛牌後會先衝高後整固。由於預計獲分配股數不多，散戶借大額孖展認購慎防賺價蝕息。專家建議股民以現金認購再吼位加注，長揸一、兩年博股價倍翻。

螞蟻科技及阿里巴巴創辦人

新股市場今年的壓軸高潮，非阿里巴巴和創辦人馬雲持有的螞蟻科技莫屬。這隻有望創下全球史上最大規模IPO的新經濟巨無霸，自十月初至上周五已「勞煩」金管局向市場注入一千五百億港元，估計當中絕大部分為認購螞蟻而湧入本港。
綜合市場消息，螞蟻會於本周二開始在本港招股，至本周五截止認購，暫定十一月五日掛牌。市傳螞蟻科技在中港合共集資三百五十億美元，約相等於二千七百三十億港元，連同行使超額配售權，上市估值約為三千二百億美元，即二萬八千億港元。
螞蟻科技早已掀起全城熱潮，成為不少散戶「必抽」的新股。問題只是採用現金加「人海戰術」認購，抑或借大額孖展博分得更多。綜合各大券商，已經預留近一千八百億孖展額度。當中耀才（1428）約佔四百億、富途約有三百億元。

螞蟻科技旗下的支付寶與長和系創辦人李嘉誠旗下的長和組合營，一八年在香港推出AlipayHK。右二為螞蟻科技董事長井賢棟。

升兩成以內可加注

耀才證券行政總裁許繹彬說︰「我哋希望做到五百億孖展，好多客已經問定。不過投資者要注意利息風險，上星期隻藥明巨諾（2126）已經要兩厘八，今個星期螞蟻招股更加水緊，息率隨時抽到去三厘幾四厘！」
隨着今季更多散戶參與，不少稍具概念的新股動輒超額認購數百甚至過千倍，中籤率因而極低變成「攬炒」。螞蟻科技無疑「熱到爆」，但首日未必可以大升，打算借盡孖展短炒的股民要冒賺價蝕息的風險。
「呢隻蟻真係太火熱，就算借好大額孖展都未必分得多。由於市值大，首日升幅好難倍倍聲，都係一、兩成左右。如果認同呢隻可以長揸，不如喺市場買，博長升長有。」許繹彬說。
豐盛金融資產管理董事黃國英認同，抽螞蟻分到的股數不會多，散戶可考慮上市後吼位落注或加注。「升兩成以內買住啲先，一定係長揸。螞蟻做嘅金融科技生意條跑線好長遠，發展空間好大，仲有先行者優勢。」
他估計螞蟻掛牌後股價短期內會衝高一段，之後回落整固再慢慢上升。「隨着股價造好，螞蟻嘅波動性會降低，成為基金經理組合中嘅『穩定資產』，唔會輕易拋售，就好似揸住騰訊（0700）同阿里巴巴一樣。」

前特首董建華與馬雲相當老友，其三名子女持有的投資公司Domenick Limited ，一八年已參與螞蟻科技境外股權融資。