為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2020 年 10 月 22 日

康宏爭奪戰 「台灣幫」「深圳幫」再度交鋒

康宏環球(1019)第二大股東深圳內房佳兆業「太子爺」郭曉群早前出信畀董事會,要求召開臨時股東大會(EGM)撤換現任董事局,並委任前港鐵主席馬時亨同「董事王」石禮謙等六人出任董事,本周一成功爭取開會。臨時股東會將於十一月二十六日在灣仔莊士敦道互信大廈舉行,「台灣幫」同「深圳幫」勢將再度交鋒。
股東會仲未召開,康宏股東針對大股東「台灣幫」富邦蔡氏兄弟同現任董事會嘅行動就率先升級。有小股東喺證監會同富邦銀行門口拉橫額「示威」。至於康宏就發功還擊,近兩個星期積極賣廣告,強調公司有「打不死的精神」。
另一邊,同蔡氏兄弟相熟嘅董事吳榮輝高調接受訪問,力撐包括自己在內嘅現任董事局。佢話康宏過去三年經歷股東爭鬥後已經起死回生準備「出院」,現時無必要更換管理層。接近郭曉群陣營消息人士對吳榮輝嘅講法不以為然。
佢認為康宏嘅公司管治「沒有最差,只有更差」。消息人士稱,吳榮輝已經多次公開指完成復牌工作,事實過去三年不但沒有發出任何審計報表,針對聯交所五項復牌條件中,至今年十月一日,一項都無完成,「現有董事會成日話有能力解決問題,根本得個講字,一直未有兌現,仲話出院 ?」由於公司長時間停牌,郭曉群提出解散原來董事局,明顯對保障小股東權益有幫助。

康宏環球公布,將於下月二十六日在灣仔莊士敦道互信大廈舉行股東特別大會,議程包括罷免現有全體董事會成員。

 

股東特別大會議程同時包括建議委任六名人士出任董事,包括前港鐵主席馬時亨,同埋經民聯立法會議員石禮謙。

 


康宏現任董事除咗吳榮輝外,其他人全部唔係股東選出來。消息人士話一七年十二月康宏停牌後,吳榮輝迅速搵咗六名董事入局,質疑佢哋同吳關係密切。呢六個人亦無得到股東大會正式受權,完全違反公司管治基本原則。至於吳榮輝本人雖然係一六年股東大會被選出嚟,但任期已超過三年。按照公司管治原則,佢去年應該退落嚟重選。
消息人士質疑,由吳榮輝委任嘅現任董事會上場無耐,一八年初康宏就話損失比預期大八倍。與此同時,過去幾年康宏以億元計投資不斷燒錢嘅金融科技公司。一八年更不惜勁蝕三億出售持有嘅第一信用(8215)股票。康宏股東唔一定同意呢啲決定,只係董事會控制咗公司又唔開股東會,搞到股東苦無辦法。
其實一眾康宏股東最關心公司何時復牌,同埋停牌前嗰四十七億八千萬元淨資產,包括八億現金嘅最新狀況。吳榮輝接受訪時只係輕輕帶過:「現時資產規模已跟當年有別,但審計工作未完成無法交代。」

上周數名康宏苦主到證監會遞申訴書,當中有人表示遇着除牌,將有激烈行動抗議。

 

康宏環球執董吳榮輝稱公司現時資產規模已跟當年有別,但審計工作未完成故無法交代。