七十五萬改髮界 王百羽被寸爆

無政黨背景嘅本土派元朗區議員王百羽，近日被爆喺超級區議會參選人中花費最巨，選舉總支出夾埋使咗四百八十九萬元，網民睇完真係眼都凸埋。當中最耐人尋味嘅，係花七十五萬做形象指導。近日有眼利網民搵返佢一六年嘅大頭相出嚟，發現除咗雙下巴明顯咗外，最大分別只係將頭髮嘅分界由右邊撥去左邊，改為由左邊撥去右邊；而眼鏡框亦由黑色粗框改為幼框。呢個改動值唔值七十五萬？真係好考大家眼力。工聯會立法會議員陸頌雄都忍唔住喺社交媒體暗寸一句「七十五萬元搞形象指導……我究竟見到啲乜？ 」

王百羽毫花七十五萬「裝身」，卻畀網民發現只得髮型分界同眼鏡框有輕微改變。