為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 名人薈  > 名人專訪 2020 年 09 月 29 日

大智若御 羅御軒

書中除了有黃金屋,還有大智慧可尋,胡曦文(原名胡敏珊、Christy)的男友羅御軒(Joseph),就藉寫書找尋到自己的人生意義。
自小跟家人移民澳洲的Joseph,在商界打滾近廿年,博覽群書的他,近年出書教人追尋快樂,為心靈減壓。「有朝一日,喺自己嘅喪禮上回顧一生時,我想自己可以為呢個世界,作出少少貢獻,期望我嘅書,可以啟發到其他人。」
他和女友都喜愛旅遊,二人旅行的意義,就是窺探人生奧義。「人生無常,唔一定活到年老,今年我四十歲,要把握機會,睇吓呢個世界!」
快樂無價,知足常樂,除了是他人生的座右銘,不就是真正的大智慧嗎?

在商界打滾多年的Joseph,現階段希望多放時間在慈善事業,幫助更多有需要人士。

身為悉尼科技大學澳洲與中國關係研究院的顧問委員會委員,Jospeh為促進中澳和平關係出力,與現任澳洲總理莫里森(Scott Morrison)合照。 

 

 

快樂書中尋

從事金融及投資業近二十年的羅御軒,九歲便舉家移民澳洲悉尼,他於十幾年前開始寫書,近年回港發展,除了重新出版舊作《Living Greatness》,亦寫了心靈書籍《無憂熊貓》。
「原版《Living Greatness》,係我喺〇七年寫嘅,大概一年半前,喺澳洲、美國、印度同香港等地,重出新版。我喺呢本書訪問咗十位唔同界別人士,分享佢哋嘅人生意義、探討快樂。其中一位受訪者係《心靈雞湯》嘅作者Jack Canfield,佢覺得人要搵自己嘅生存價值,內心深處最渴求嗰樣嘢,未必係世俗追求嘅物質財富,佢嗰份Passion ,對我啟發好深!我覺得喺o依家呢個時勢,好多人都要呢啲智慧。」
在澳洲大學修讀會計、金融,畢業後在金融界打滾數年,當年只有廿八歲的他,總覺得生活若有所失,「嗰時喺金融機構做總經理,我成日喺度諗,永遠久戰,啱唔啱自己?」
然而要追尋大智慧,談何容易?一切由〇七年的印度之旅開始。「廿八歲嗰年,我第一次去印度,對我有好大衝擊。嗰度好似幾十年前嘅香港同澳洲,貧富懸殊好嚴重,大部分人雖然好窮,但臉上總係有笑容。我開始反思,快樂究竟係咩?於是開始寫我第一本書。跟住嗰十幾年,我去咗三十幾個國家遊歷,印度都去咗七次,睇咗接近一千本書,研究好多宗教哲理、馬雅文明等等,對我嘅人生啟發唔少!」
三十出頭時,他已看透世事無常,希望藉着文字,改變生命。近年他便出書,教心靈治療,書名叫做《無憂熊貓》。「話說深山住咗隻有好高智慧嘅熊貓,係智慧泉源,可以幫人解決人生煩惱,透過小故事,教人生道理。o依家人人都唔開心,希望用啲勵志故事,俾多啲希望大家。」

 

最近他出版心靈書籍《無憂熊貓》,國際時裝設計師Vivienne Tam亦有推介。

他認為「無憂熊貓」是快樂與智慧的象徵,將會用它來製作動畫及研發相關的產品。

在過往一年,他將《Living Greatness》重新出版,最新中文版叫《用此力量,戰勝昨日的自己》,英文版則為《Authentic Power and Greatness》。

 中東歷險記

喜愛旅行的Joseph,談到遊歷,顯得非常雀躍。喜歡尋幽探秘的他,女友Christy自然成為他的最佳旅伴。「我同Christy都好鍾意去印度,喺嗰度佢話唔使扮靚、唔使用名牌,人好自在。不過最好帶定平安藥,記得有次我大感冒,想去睇醫生,但人生路不熟,好彩酒店有in-house醫生咋,仲上房幫我診症,真係好好彩!」
另有一次,他和Christy去中東旅行,豈料入境時要過五關,斬六將。「嗰次去完以色列,再入約旦,點知過關時,好似俾人審犯咁審。官員問Christy住邊間酒店?會去邊度?因為行程係我Plan,佢全部答唔到,我想幫佢答,個官員即刻鬧我!我哋去咗幾個國家,佢連國家名都講錯晒,我心諗,『今次死啦,實以為我哋做間諜』。
「後來,官員仲分開咗我哋問話,佢俾人審犯咁審,我個心好焦急,又驚上唔到飛機,後來佢唔知點拆,又俾佢拆掂咗。呢次經歷真係好恐怖,下次去呢啲地方,都係我自己同朋友去好啲啦,哈哈!」
幾年前,他又去過復活島旅行,畢生難忘,「成個島有成千件巨石像,有啲仲有下半身,件件幾十噸重,千幾年前係點運送,又鑿咗幾耐呢?真係匪夷所思!呢啲係超越人類嘅智慧,我即刻感覺自己好渺小!」
最近大半年沒法出國旅遊,Joseph一有空閒時間,就會練習冥想,紓緩情緒。早前他和Christy 合作搞慈善基金,計劃推出冥想App,讓人免費下載,幫大家抗壓。

他與女友Christy曾到以色列旅行,之後二人入境約旦,被海關人員嚴格審問。

曾參觀復活島的千年巨石像,見識大自然的鬼斧神工。

秘魯天空之城——馬丘比丘,「石頭之間連一張A4紙都攝唔落」,是他最深刻的遊歷之一。

他和Christy創辦了御曦快樂國際慈善基金會(JC Happiness Charity Foundation)。當天有好友黃百鳴和溫碧霞等出席和支持。

 

結婚有共識

因疫情令旅行無期,他大嘆︰「本來計劃今年年頭同Christy一齊返去澳洲探父母同家姐,o依家惟有等啦!」
跟女友拍拖兩年半,談到另一半Christy,Joseph立時變得溫柔︰「好感恩遇到佢!我哋嘅價值觀好相近,大家又鍾意做善事。佢鬼妹仔性格,無咩公主病,唔會有隔夜仇,有爭拗一定會即日傾掂佢。」
幾年前,二人在一個慈善活動中認識,可說是惺惺相惜,「當年,我係澳洲願望成真基金嘅大使,而Christy就係捐助人,我哋識咗之後,就慢慢發展,大家都好夾。間中都會送小禮物,寫吓卡俾佢,維繫一段關係,心思好緊要。」
他又透露,女強人Christy其實好叻下廚,只是工作太忙,不過間中都會為男友煮消夜;至於結婚,做事周詳的他,就說要好好計劃,「兩年前,佢已經去過澳洲,同我家人相處好好。我哋有共識結婚,只係大家太忙,希望疫情過後,可以好好計劃一吓啦。」
問到他會否生小朋友,他直言當舅父仔已經很滿足,「我有兩個家姐,有五個外甥,家庭關係好融洽。目前嚟講,我哋嘅BB咪就係慈善基金囉,幫助多啲有需要嘅人吖嘛。」

二人對印度情有獨鍾,在印度古城鎮拍照留念。