為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2020 年 10 月 01 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

越秀地產6+1渠道增土儲

上星期出席「優質中國房地產企業大獎」頒獎禮,趁機同一班老友敘舊。大獎評審以業績、前景、管治規範、項目執行、品牌形象及社會責任作為準則,選出今年優秀房企。另外,市場對物管嘅增值作用大加肯定,所以大會亦新增「優質物業管理大獎」。
會上見到越秀地產(0123)投資關係部總經理姜永進(Michael)嘅身影,不忘恭喜佢代表公司再次攞獎。事實上,越秀地產由一六至二〇年連續五年獲頒呢項內房獎,可見公司發展策略得宜,能持續取得佳績。公司亦連續兩年被納入恒生可持續發展企業基準指數成分股,ESG表現總評分保持A級。
越秀地產上半年合同銷售創新高,根據最新通告,今年首八個月合同銷售逾五百一十六億元(人民幣,下同),按年上升一成七,佔全年目標八百○二億元嘅六成四。上半年收入升百分之八點八至二百三十七億元,應佔純利上升百分之六點七至約二十億元,中期派五點一仙。公司喺疫情下依然保持穩健成績,有賴對市場睇得通透,並敢於革新,例如隔離期間開創新銷售方式,轉攻網上平台賣樓,確保現金周轉不受疫情影響。

越秀地產投資關係部總經理 姜永進(右)。

 


土儲係房企發展嘅本錢,買地係人都會,但能用合理價錢拎到優質地塊至係關鍵。Michael解釋越秀地產嘅買地系統,簡稱為「6+1」。所謂「6」,係指發展土地嘅模式,其中包括「軌交+物業」、「國企合作」、「城市更新」、「住宅+配建」、「收購併購」和「產業勾地」。而「1」,就係透過公開市場競拍快周轉項目,以補充土地儲備。通過多元化渠道,越秀地產可以運用非市場方式,配合市場買地,平均成本可以降低,亦可以攞到較獨特地塊,並提升喺各區嘅規模與競爭力。上半年,公司透過多元化購地策略,用較低溢價喺廣州、杭州、蘇州等新增五幅優質土地。
當中「軌交 + 物業」發展即係同廣州地鐵集團合作,專攻大灣區,我之前都有介紹過。今次講下「住宅+配建」,公司就係用呢個方式以底價攞到廣州番禺長隆南地塊,實質點運作?Michael舉另外一個例子,公司八月時通過競拍方式取得廣州番禺南村一幅地約九成五實際權益,根據「住宅+配建」模式,需要配建華南理工校區一項工程,建成後無償移交政府。公司應佔地價十二億元,加埋配建成本就大約十四點五億元。呢種方式對於發展商和當地政府都有利,可以話係雙贏方案。
地域方面,越秀地產繼續發展大灣區市場,同時尋求開拓其他具有活力嘅經濟帶,六月底時總土儲逾二千三百萬平方米,分布全國十九個城市,而大灣區六個城市佔總土儲近五成四。
公司預期下半年可受惠於積壓需求,而政府加大供應以穩定地價和信貸保持寬鬆,都係利好因素,因此有信心可把握市場回暖嘅時機,達成銷售和現金回款目標。