為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2020 年 09 月 24 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

非常生意經

美國3M公司一位科學家喺六十年代計劃研發一種超強力黏貼膠,但一直唔成功,黏貼膠一黐就甩,不過就無意中「發明」咗一種低黏性、可重用嘅貼紙。幾年後,有同事用嚟做書籤,覺得好用,提議公司將呢項發明變成書籤推出,仲改名為「Press 'n Peel」,但並唔成功。終於3M再改變產品用途並改名為「Post-It」,結果漸受歡迎。呢項研發被譽為商界最成功嘅失敗案例。
產品以至公司嘅成敗,固然取決於宏觀環境,但公司能否因應時勢改變產品特性、應用、營運模式等,亦係其中關鍵。變革唔一定成功,但唔變就難有贏面。我又數下喺疫情非常時期,不同行業如何求變求生。
先講講航空業,對於重資產嘅航空公司,的確難以短期內翻身,但亦有不少公司努力求變,例如申請將部分客機轉為貨機,迎合網購貨運需求。另外我見到好多航空公司推出專機搶客,更有創出「無目的地航班」(Flights to Nowhere)概念,即係起飛同降落都喺同一機場,空中兜一圈遊下飛機河。

疫情下「Staycation」廣泛流傳,各行各業都要求變保住生意,其中酒店推出不少Staycation套餐吸客。

 


另外,泰航已申請破產保護,但都繼續諗計搵錢,例如將曼谷總部員工食堂,改造成飛機主題餐廳,採用泰航機艙設計,包括飛機座椅以及同機艙地板一模一樣嘅地氈,餐廳外設置登機樓梯和行人橋,甚至提供登機證,加埋由空姐送餐,場景逼真。呢間餐廳九月開始營業,吸引不少客人「登機」。到底遊飛機河和食飛機餐能否持續吸引消費者,呢點我有疑問,但起碼能夠刺激短期消費,他日仲可以考慮將餐廳升級做頭等艙,增加吸引力。
遊客和商務旅客銳減,令酒店房間空置率飆升,加上限聚令實施,宴會生意同受打擊。早幾個月有酒店為需要接受強制隔離人士提供住房套餐,又推出長租計劃,部分租金平過租屋住。另外不少企業實施在家工作(Work From Home),部分係強制同事唔能夠返公司,但有員工屋企唔方便工作,於是有酒店趁勢推出「在酒店工作」(Work From Hotel)套餐,有啲日租幾百蚊,有辦公地方更有餐飲提供,甚至有視像會議支援。有酒店索性同共享工作間品牌合作,撥出樓層轉為辦公地方。
「Staycation」喺二○○九年被字典收錄成為一個新字,但到今年因為疫情至真正廣泛流傳。香港酒店呢幾個月紛紛推出Staycation套餐,我粗略瀏覽,最平幾百蚊有交易,亦有貴價嘅包埋米芝蓮套餐或自助餐,有贈送商場購物券或贈品,部分更以寵物友善作為賣點。至於同屬重災行業嘅旅行社,我見東瀛遊、縱橫遊、康泰和永安先後拓展網購平台,以類似代購形式,利用本身人脈為冇得去旅行嘅港人搜羅環球名物。
餐飲行業又有乜橋?外賣係其中一條出路,但連米芝蓮三星餐廳都加入行列,競爭越來越激烈,除咗要性價比高,都要玩下gimmick。好似有五星級酒店同藝術家合作,推出特色主題下午茶套餐,以精緻嘅紙層架放食物,仲附送公仔。非常時期非常創意,我誠心祝願大家能保住生意,待日後重新出發。