為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2020 年 09 月 17 日

泛民選擇性抽水 港青潛逃台灣 被扣無人理

泛民選擇性炒作又一巨獻,呢次輪到煲大十二名潛逃離港,但在內地海域被截獲嘅香港人,立法會議員朱凱廸同涂謹申日前高調安排一班自稱係「家屬」嘅蒙面人開記召,個個聲淚俱下,又話拉咗二十幾日一啲消息都冇,又話有病要食藥,總之有百個理由要內地放人。
之不過同一時間,台灣傳出有五名港青七月中下旬非法入境台灣被截獲,一直扣留喺高雄至今接近兩個月,無法聯絡親人,無律師代表,當局甚至無公開被捕人士姓名,真係分分鐘遭遇不測都無人知,情況點計都差過畀內地拉嗰十二人。之但係,泛民就完全隻字不提呢五個人,擺明大細超兼選擇性抽水。

台灣海巡署在七月中下旬截獲一艘計劃偷渡至台灣的船隻,船上載有五名港人。

 


工聯會立法會議員陸頌雄批評泛民高調引入外國勢力干預中國事務,只會令事件變得政治化,直言「(泛民)只係政治先行,從來無真心幫過年輕人,對內地被扣嘅就高調開記招,但喺台灣被捕五人,點解唔叫埋佢哋家人出嚟?唔該香港人醒吓啦!」
陸頌雄話泛民做法係雙重標準:「內地當局起碼為十二名被捕人士安排律師協助,只係當事人選擇唔要,但台灣當局連律師都唔畀五位被捕人士請,做法咁唔公平,又唔見泛民出聲批評?佢哋只識鬧中央政府、特區政府,見到台灣政府就粒聲唔出。」
立法會議員陳恒鑌直斥泛民高調開記召,旨在針對性抹黑中央政府,而非真心幫「手足」:「五名被台灣扣留嘅港人音訊全無,按照佢哋同台灣嘅友好關係,理應可以協助,但佢哋選擇唔出手,係唔想得罪台灣政府?還是泛民只係見到十二名港人呢單案,有機會抹黑中央,先會加把勁大做文章?」
他呼籲十二名被捕人士嘅家屬應該尋求特區政府或真正有心人協助:「我感到十二名被捕人士仲未醒,佢哋嘅家長都未醒,呢個時候走去搵泛民,除咗畀機會佢哋抽水,絲毫無助被捕人士,真心希望佢哋盡快醒覺!」
身兼行會成員嘅立法會議員張國鈞認為泛民對被捕五名港人採取不問不聞的原因,是不想撕破台灣政府的真面目:「民進黨口說支持香港人勇武抗爭,但當抗爭者大量湧去台灣尋求庇護,佢哋就擔心人數太多,有所保留。泛民唔敢插手,係礙於唔想撕破政治現實,打擊香港勇武派嘅士氣,背後其實相當醜陋。」

朱凱廸(中)同涂謹申(右)高調安排十二名被捕人士嘅家屬開記召,但對於早前被台灣扣留近兩個月嘅五名港人,卻視若無睹。

 

被捕者家屬蒙晒面見記者,稱至今未獲港府嘅實質協助。