為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2010 年 12 月 14 日

喂,我仲未死!劉浩龍

劉浩龍(師兄)除黑仔之外,總是予人撈了很多年都一事無成的感覺。

有多首為人熟悉的歌,不過紅歌唔紅人,入行至今捱足十四年,最慘係要呃住日日擔心個仔前途的劉媽媽。

「有兩年時間我要扮嘢話有嘢做,諗藉口呃住阿媽話好多嘢傾緊,其實當時乜都冇。」師兄說。

一出道就畀人話個樣寸,態度衰,更兼成日走去蒲,形象不算好,不過窮途竟然唔係末路,絕境靠樣衰重生,拍戲專做衰衰格格搞笑古惑仔,反而殺出一條小血路。

就連林建岳都曾經問過師兄:「其實你以前係咪真係出嚟行過古惑?」

師兄自問唔寸,但天生個樣係咁,一切得來不易,冇運行,惟有靠自己。

「若果我再有機會得獎,上台講嘢我第一個要多謝自己,竟然可以捱到今時今日,都仲有嘢撈,大家又唔覺我太老餅,仲想點?」

用了十幾年時間,外人可能看不透,只是師兄並唔覺得自己係原地踏步。

「喂!我仲未死,捱得過,所以今年有四套戲上!」師兄平靜地說。

講拍戲

時勢造英雄?我信。

34歲,屬龍,獅子座,性格衝動、自我,極度信自己。

三十幾歲人又唔係靚仔,乜角色都可以試。《李小龍》入面做漢奸、白粉拆家,總之就係衰人,我阿媽睇完直頭擔心我拍戲做到咁奸,第時會唔會好難轉形象。好彩梁家輝話我做得有七十分,好滿意啦!

有場戲要我在竹棚上跑,個棚有三層樓高,下面乜都冇,唔好彩跌落地真係死得,我160磅,你話唔驚就假,但都係要頂硬上,後來亦真係有工作人員受傷,我直頭同李治廷兩個面青青互望。

拍完之後好有滿足感,因為真係搏番來的。錢嘉樂問我:「你好搏喎?」我話唔搏等幾時?拍《神槍手》時都受傷斷過韌帶,所以我知道拍戲要好專心,我以前成日掛住玩,依家唔係咯。

好似拍《飛砂風中轉》,開拍前半年導演莊文強就叫我扮梁朝偉,於是睇《無間道》30次嚟學,後來我問佢其實我真係似咩?點知佢話:「呃鬼你之嘛!」我依家會睇黎耀祥本《戲劇人生:黎耀祥論演技與人生》學做戲,又會由西環一直行去筲箕灣,不停咁睇途人表情神態。

順便介紹好片,唔係賣花讚花香呀,不過我有份做嘅《擁抱每一刻花火》(○五年)其實好好睇,得閒買隻19蚊VCD睇啦!

在天台扮梁朝偉的師兄,其實不斷流眼水,閤埋眼唔係扮陶醉,佢真係掹唔開到眼。

《為你鍾情》是師兄今年上的四部戲之一,形象貫徹古惑。

講唱歌

97年新秀得獎後去了TVB,由唔識講嘢變成可以做音樂節目主持。後來確實係有幾首好歌出,好多人識好多人唱,但就係紅歌唔紅人,這幾年歌緣好似走咗咁,但係拍戲又有出路喎,可能緣份去了電影度啦!

緣份的事無人知,即係等如做人邊個會估到,我華星出身,經歷公司執笠,到04年先至正式出碟,今年至再簽番華星,即係要十三年後至再返去,我自己當出道係04年,同期應該係房祖名。

依家我好珍惜機會,以前錄歌幾個鐘就一首,家陣唔係囉,新歌〈冇事有心〉錄足六日,啱啱至單曲派台。

19歲已經自己一個人搬出來住,無論幾時都係自己顧自己,華星係、自己出錢錄歌又係,若果我再有機會得獎,上台講多謝的話,第一個我會多謝自己,佩服自己竟然可以捱到今時今日。

扮梁朝偉做低能卧底,《飛砂風中轉》的演出備受好評,師兄更被讚為最搶鏡的男配角。

講扮型

曾經好憎記者同報紙雜誌,應該話好驚,更加唔鍾意做訪問,大佬呀!我一出道就畀寫衰、寫臭、寫死,當年仲要冇facebook冇微博,全無反擊機會。

係!我係鍾意去玩去蒲,大佬呀!後生邊個唔鍾意玩呀?但04年後已經冇去喇。有人話我樣太寸,成日戴黑超扮晒嘢。其實我唔係寸,係我個樣生成係咁,至於戴黑超係因為我對太陽光敏感,入行到依家,我成日流眼水,我唔係扮型扮cool,我真係會盲!

中三時打籃球減肥,打打吓突然間眼前黑晒,盲咗半個鐘,驚呀!所以之後成日戴黑超,咁咪畀人話囉!不過依家唔驚喇!負面新聞?算啦!冇乜大不了,鍾意講乜就講乜,比收收埋埋其實仲容易畀人了解。

做人唔開心梗會有,遇到過、跌低過至係成長經歷,好多事唔係自己親手錯過,係唔會得到教訓,人哋點講都冇用。

講媽媽

十幾年來,我最想多謝媽媽,佢一直好支持我,但都有擔心,未出到唱片前,媽媽曾經同我講:「你廿幾歲人,唔得就唔好浪費時間啦!」當時媽媽成日畀人問,阿劉浩龍撈咁多年都唔掂,好似死唔斷氣咁,我知道佢其實都好大壓力。

出面人都認為要大紅大紫至係得,大佬呀!你做份普通寫字樓工,都唔係個個做到CEO啦?好彩冇乜人知我有細11年的妹妹,至少冇人會問佢,「你阿哥撈咁多年都唔掂,想點呀?」

大概有兩年時間,我係不停扮嘢話有嘢做,用各種藉口呃住阿媽,同阿媽講話傾緊出碟喇、就得啦!其實當時乜都冇,食老本。

講煲煙

戒煙兩年幾,以前成日同其他人一齊時煲煙,戒煙之後第一個同何韻詩講對唔住,因為以前成日對住佢煲煙,家陣至發現二手煙真係會影響到其他人。醫生話三十五歲前戒煙,幾年後個肺就可以好番,太遲就唔得,我食咗十幾年煙,但係依家屋企絕對禁煙。

我要講一直都係自己一個人住,從來冇同人同居過,所以咪唔識同人相處囉,我自己好姿整,同人住好麻煩。不過,唔食煙有度唔好,就係好難識女仔,成日畀朋友笑我唔係志明,所以溝唔到春嬌。

師兄可說是微博達人,是最早加入的藝人之一。這張半裸照就成功為師兄短時間內引來過萬「關注」。

講拍拖

曾經有三段情,分別是七年、三個月和四年,現在真係冇女朋友。朋友知我冇辦法識女仔,做呢行本來就難,我自己又好細膽,對住女仔會面紅,又好驚畀女仔reject,唔到百分百肯定成功,我一定唔會示愛。所以近期朋友成日安排相睇party,無啦啦四個人食飯,擺明係介紹個女仔畀我識!

再拍拖我一定會公布,收埋太辛苦,但起碼拍了一年穩定之後至講。

上星期與鄭融在活動見面,多謝佢關心,我們曾經是非常好的朋友,一世也是。

我依家只想可以喺紅館開演唱會,所以keep住做運動,每日跑十公里或者游水,朝早食兩隻蛋、一塊麵包,夜晚就淨係食半個西瓜,不過暫時都未有機會。

給師兄的信

訪問中每次提到「鄭融」這個名,師兄的第一個反應都是:「鄭融?唔好講啦!」眼神亦隨之轉淡,感覺極度餘情未了。這封信特登為師兄你而作,望能笑納。

劉浩龍與鄭融有過一段四年情,去年師兄在電台節目上親口承認已分手,但說時「講到就嚟喊咁!」更被主持吳君如取笑「個樣仲好愛佢」。據傳當時鄭融轉投唱片監製莊冬昕懷抱,但近日卻又傳已分手。上星期劉浩龍和鄭融亦在活動上大方合照。

〈師兄〉:

自從〈電子歌姬〉離開你這個〈二等天使〉,一變成為〈舊人〉後又得到〈氣管炎〉,只聽到你說〈神啊!求求讓我睡〉。幸好還有大班〈戰友〉與你慶祝〈恢復自由〉,唔會搞到〈思覺失調〉,也不用〈嬲〉住大嗌〈Shut up baby〉!

其實對方與〈緋聞男友〉,好像〈很久沒見〉甚至〈變臉〉收場,只能〈好自為之〉。

請聽我一句,找對象還是靠〈緣份〉,最重要合〈眼緣〉,你又唔係〈十惡不赦〉,只要跑完步去〈洗澡〉。

仲有你這顆〈滄海遺珠〉要〈記得〉〈火花不等人〉,最緊要係你仲識得同我講〈冇事有心〉。

祝早日〈斷尾〉!



PS.師兄,你的歌夠你再開演唱會有餘,請早日完成心願。就算唔係紅館,變咗伊館、Starhall定西灣河文娛中心,都一定有人捧場,斷估你最少會送飛一世都係好朋友嘅鄭融啩!