為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2020 年 09 月 12 日

彭懷安 古惑佬變好老闆

前組合EO2成員彭懷安(Eddie),近年參演唔少無綫劇集;而最擅長演古惑佬、黑社會角色嘅佢,最近又喺新劇《反黑路人甲》中,飾演晨爺(姜大衛)嘅頭馬「劍熊」,演出入形入格。
不過,現實中嘅Eddie係幾間茶餐廳嘅老闆之一,經常親力親為落舖頭打點一切。而喺疫情底下,身為老闆嘅佢,就更加不辭勞苦,苦撐起幾間舖,盡量避免關門大吉,希望旗下茶餐廳喺疫市中求生,同時保住大班員工嘅飯碗。
早前,喺大埔太和,東姑就發現Eddie喺佢自己間茶餐廳嘅分店,落手落腳幫手,特別係督促員工,加強防疫。現場所見,茶餐廳喺早、午市嘅堂食,亦跟足政府嘅規定,原本平時日日爆棚座無虛席,但如今都大幅減低座位數目;而枱與枱之間,仲加咗唔少圍板阻隔,做足防疫措施。就連員工用嘅手套、口罩,都高規格過人,口罩標榜係香港製造、加印餐廳名喺上面;而員工用嘅銅纖維手套,仲聲稱防菌兼滅菌,就係希望食客食得安心又放心。
當日,東姑眼見Eddie由頭到尾,一腳踢,除咗幫手斟茶、傳菜、執枱呢啲侍應工夫之外,仲負責埋企門口幫客人量體溫,以及定時定候清潔消毒手柄、門柄咁,毫無架子,認真係好老闆喇!

幾間茶餐廳老闆之一嘅Eddie,喺疫境之下艱苦經營,親身落舖頭幫手,周圍消毒加強防疫嘅工作。

 

Eddie全程一腳踢,仲做埋清潔嘅工夫,喺疫情嚴峻之下,加強店舖嘅衞生,等顧客食得安心。

 

茶餐廳午市期間,Eddie主要負責企門口,為幫襯嘅客人,用探熱計量度體溫。

 

 

 

茶餐廳採用香港製造、加印餐廳名嘅口罩,以及戴上銅纖維滅菌手套,而Eddie現場亦不時提醒員工,提高防疫意識。

 

身為老闆嘅Eddie,沖茶遞水一律落手落腳做,毫無架子。

 

擅長演古惑佬角色嘅Eddie,在新劇《反黑路人甲》中,飾演社團大佬晨爺(姜大衛飾)嘅頭馬。