為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2010 年 12 月 14 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

十二年一會

「金牌飯局」即將昂然邁向六周年,我預備咗大禮送畀你哋,詳情將會喺兩期內公布,記得密切留意!

至於今期,有大禮送畀你哋嘅,係即將喺元朗劇院開show嘅一眾「藝進同學會」嘅同學。當中大家較為熟識嘅有林家棟、李國麟、祝文君,加上第三期藝訓班畢業生、現任「香港話劇團」藝術總監陳敢權重新編撰劇本,同學們上下一心演出《才子亂點俏佳人》,一搔十二年嘅話劇癮!>

今晚我帶菁瑋、祝文君、陳Sir陳敢權、林家棟同李國麟(左至右)去到位於The One嘅「CAFFÈ VERGNANO」歎意式風情。

大師兄領軍

「藝進同學會」不嬲都上下一心,一眾同學都尊稱陳敢權為「大師兄」之一,陳Sir謙稱:「其實好多同學都心繫『藝進會』,我就係第三期藝員訓練班出身嘅,同期仲有發哥(周潤發)、林嶺東、吳孟達等等,可能因為資歷深,佢哋先咁叫我啫。」

哈哈哈!我用得「謙稱」,你就知陳Sir並非只因資歷而被尊稱「大師兄」啦!現任「藝進同學會」主席祝文君即時補充:「今次我哋可以用『香港話劇團』首次合作,全靠大師兄冇忘記到我哋一班同學,佢唔單止新編《才子亂點俏佳人》嘅劇本,仲幫我哋聯繫,咁樣我哋一班同學先可以再次聚頭過戲癮。」

我答應去捧《才子》場,預計會捧腹大笑!

至於男主角之二嘅家棟同「阿窿」(李國麟),係其中兩位既有參與98年《才子》,又有份演出2010年新版《才子》,兩位公認嘅演技派,反而話做舞台劇有時都會考起佢哋o架

「阿窿」話:「做舞台劇同平時我哋做電視劇或者拍電影好唔同,舞台劇係即時會攞到觀眾嘅反應,而且冇take-two,對我哋鍾意演戲嘅人嚟講好有挑戰性。

「加上同唔同嘅對手會擦出唔同嘅火花,所以真係過足戲癮。」

家棟(右)對一眾同學可以濟濟一堂演出,十分興奮。

前菜之一係意大利蘑菇伴希臘軟芝士($56)。

另一前菜係煎帶子伴小馬鈴薯配紅酒醋汁沙律($82)

戲曲舞台劇

家棟就話:「《才子》係以戲曲形式演出嘅舞台劇,所以我哋都要跟老師學有關嘅嘢:做手呀、關目呀,全部學過晒,因為始終冇做同類型嘅嘢12年,都要重新去學過。

「除咗戲曲、排戲之外,我哋一班同學仲要排舞,我好開心可以同一班同學會嘅朋友去做呢件事,好似『阿窿』話齋,喺整個過程同唔同嘅對手過招,一方面睇到佢哋喺呢12年嚟嘅功力進步,另一方面又滿足到自己嘅演戲慾,係一個不可多得嘅經驗。」

資歷較淺嘅菁瑋(左),原來係戲曲「大師姐」。

哈哈哈!高手過招,最大得益歸於觀眾,我必定捧場!而對於「十二年人事」,家棟感受原來最深,「12年前我嘅知名度唔及依家,就係因為有TVB高層去睇《才子》,睇到我嘅演出,之後再搵番我去拍劇,機會多咗先愈嚟愈多人識。

「所以今次我都鼓勵多啲新入會嘅同學,多啲參與,努力之外都要有人賞識,上得台就係一個機會,我同菁瑋、黃嘉樂等等都係咁講o架。」

亞枝竹蘑菇橄欖素菜薄餅($95),啱晒素食人士。

廚師精選薄餅($138)以火腿、水牛芝士、番茄、火箭菜作配料。

三文魚火箭菜闊條麵($82)香濃好味。

六場爆笑show

《才子》喺12月16日至19日喺元朗劇院演藝廳開show,依家一眾同學正積極排練,除咗出席飯局嘅5位嘉賓外,有份演出嘅同學仲有盧海鵬、廖啟智同譚玉瑛等等,陳Sir話:「我哋選演喜劇,就係要觀眾睇得開心!」

同學一條心

今晚飯局嘉賓中,資歷最深就係菁瑋,佢喺09年先從藝員訓練班畢業,不過陳Sir話:「講到戲曲,菁瑋先生係真正嘅專家!」

好!我畀一個機會菁瑋介紹吓佢點解係專家?「喺入讀訓練班之前,我喺演藝學院進修過4年戲曲,主力係做小生嘅。入TVB嘅日子比較淺,今次同一班師兄師姐做舞台劇,係一個好寶貴嘅經驗,雖然喺劇入面我只係飾演丫環,但係喺排練期間,文君、家棟、『阿窿』都好照顧我哋呢啲『新同學』,學到唔少嘢。」

哈哈哈!如家棟所言,有得上台就係機會,要好好把握!我預祝佢哋演出成功,乾!

我同陳Sir(左)愈傾愈發現大家對演藝藝術同樣有熱誠。

「阿窿」講解暱稱來歷,七情上面,「我讀訓練班時,有個導師廣東話唔正,叫我做李國窿,叫吓叫吓,個個叫晒我做『阿窿』。」

三款精美甜品,各具性格!

食品之外,餐廳供應嘅飲品,一樣有特色。


CAFFÈ VERGNANO

地址:尖沙咀彌敦道100號The ONE UG221號舖
電話:2907 3817