實踐理想，永遠不太遲，黃智賢（Ben）太太駱佩文（Maggie）就身體力行，去追她的繪畫夢。
與Ben結婚十六年，以往從事OL的Maggie，行事向來低調。兩年前她毅然辭掉高薪厚職，全職畫畫，最近更不時將作品上載IG，其畫作內容多是甜品、花花草草，色彩繽紛，令人睇得開心，成功吸like。
「最後嗰份工做咗六年，離開唔容易，但係我心靈上真係需要另一樣嘢，可以搵番自己嘅興趣，仲有人認同，係始料不及嘅。」
因為喜歡食甜品，她特別將筆名改為Macaron，寓意簡單生活都可以很甜美、滿足，她希望透過畫作，將快樂傳播。

行事低調的Maggie，不欲別人經常將黃智賢「太太」掛在口邊，希望靠自己實力，讓其他人認識其畫作。

阿Ben與Maggie結婚十六載，恩愛如惜，老公更十分支持她重拾繪畫興趣。

裸辭做畫家

鏡頭前低調的Maggie，私底下原來很健談，談起繪畫，她更顯雀躍。「大概兩年前，喺西貢有間咖啡室嘅老闆娘同我傾開偈，佢話有幅牆可以俾我放畫，後來有客人買咗啲畫後Po上網，咁啱又俾Sky 100嗰邊睇到，佢哋就話想同我合作。因為水彩畫細幅啲，遊客比較鍾意，銷情唔錯，所以o依家畫多咗水彩畫。條路就係咁樣，慢慢行出嚟！」
由每天營營役役的OL，搖身一變成為全職畫家，瞬間歸於平淡，隨心而行的Maggie坦言，這是她嚮往已久的生活。「六、七歲時，媽媽帶我上過啲繪畫班，學咗半年就停咗，嗰陣只知渴望畫畫，但唔識表達，跟住一直放低咗。大個之後，我喺中環返工十幾年，有時經過畫室，都問自己係咪應該重拾呢個興趣，諗咗好幾年，直至有一日，我真係想全心全意去畫畫，咁就膽粗粗裸辭，諗住俾半年時間自己試吓，點知一畫，就好似停唔到！」
曾往多倫多修讀市場學及平面設計的她，除了小時候上過繪畫班，直至兩、三年前辭職後，她才有機會正式學繪畫，「一開始我去中環畫室學油畫，因為好鍾意油畫個質感，後來我隻狗Pepper病咗，我要喺屋企照顧佢，畫油畫唔方便，於是開始鑽研水彩畫。」
現時她最快一天可以完成一至兩幅水彩畫，油畫則平均要三至四天，「最瘋狂嗰陣，試過睇睇吓電視，靈感一到就即刻攞起畫板，連阿Ben都話我使唔使咁投入呀！」

愛畫油畫的她，當然不少得以愛犬Cream cream為作畫對象。

在西貢村屋作畫，環境清幽，這幅冬甩油畫，更被裝修師傅稱作為「麥當勞」。