為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2020 年 09 月 05 日

廣播處長太三煞 黃永 陳志雲唔吼

港台廣播處長梁家榮明年八月任滿退休,政府呢排公開招聘新廣播處長人選,搵咗一間國際獵頭公司展開「獵頭」。城中好多資深傳媒人都收過電話。盛傳做過商台策劃總監嘅黃永,以及人稱「志雲大師」嘅商台首席智囊兼節目主持陳志雲,都成為被挖對象,不過看來呢個廚房太熱,兩人雙雙耍手擰頭。
本刊八到多個資深傳媒人近日紛紛收到挖角電話,不過大部分興趣只係一般,「港台呢家咁環境,真係怕怕,況且大家係各間傳媒嘅高管,做得好好哋,做乜要攞苦來辛?」有被挖角嘅某報老總話。
獵頭公司食咁多檸檬,看來都幾頭痕。據悉眾多黑馬人選當中,有人點名做過政務官嘅黃永。擁有英國劍橋大學工商管理碩士及英國倫敦大學法律學學士學位嘅黃永,佢做過商業電台策劃總監及商業一台台長,履歷絕對亮麗。據說特首林鄭月娥亦頗為欣賞佢,一七年一度盛傳佢接替馮煒光出任新聞統籌專員,但當時黃永表明「今世都唔會做官」。事隔幾年,近日又再傳佢係廣播處長大熱人選。

被傳是處長大熱嘅黃永話○八年起已經有獵頭公司搵過佢,之後對方多次敲門,不過佢本人至今都係無興趣。

 

陳志雲承認有獵頭公司接觸佢,但佢很喜歡商台嘅自由空氣,無意做處長。

 


本刊向黃永求證,佢就答話:「唔會考慮出任政府公職,包括廣播處處長」。佢又透露獵頭公司最早一次搵佢做處長係○八年,之後間中有繼續游說,但答案都係一樣。
同樣做過政務主任嘅陳志雲,呢排都收到獵頭公司電話,以佢遊走電視、電台多年嘅資歷,亦十分夠資格。「志雲大師」向本刊承認有人搵過佢,但已告訴對方話無興趣。何解有份月薪廿五萬嘅筍工都唔做?佢話????家嘅工作做得好開心,好喜歡商台嘅自由空氣,而佢同友人嘅答覆,就係「咁咪即係要我降職?」
有傳名筆屈穎妍亦係大熱之一。就呢個傳聞,屈穎妍直至截稿前仍未有回覆。不過佢近日回應有傳媒人李慧玲指佢坐呢個位「未夠班」時,屈穎妍便發文反駁:「我有自知之明,一個擅寫的人,不一定是好領導,坊間能人太多,排隊都未輪到我。」但佢不忘炮轟港台「一定要換領導,一定要大整治,但放心,撥亂反正的不會是我,但可能是比我更狠更辣的人。」言論不減辣椒本色。
資深傳媒人通通對處長個位耍手擰頭,莫非政府最終要喺公務員體系中搵個政務官空降落去?

港台廣播處長梁家榮明年八月任滿退休。

 

自修例風波以來,港台一直處於風眼位,廣播處長呢個位,更加係燙手山芋。