為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2020 年 09 月 02 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

大數據玩家中的蘋果

好多公司中期表現受制於疫情,不過有危有機,疫情令實體經濟活動冰封,但新經濟就加速發展。早前訪問神州數碼控股(0861)公司就公布咗一份令人眼前一亮嘅中期成績表。
公司上半年總收入增一成至八十三億元(港元,下同),淨利潤更加爆升九百二十一倍至二點四億元。神州控股首席運營官郭鄭琍(Maria)解釋,上年基數固然係低,但增長驚人亦正正因為疫情和中國推動新基建。原因係要控制疫症傳播,就要用智慧信息管理好城市嘅人和物,令市民更安全,呢兩點正係公司主打,所以能夠逆勢增長。現時國內新基建公司一百強之中,神州控股排名已經升上第一位。

神州控股COO郭鄭琍(左)。

 


對於新基建、大數據公司,未必人人掌握到業務重點。Maria用一個比喻嚟解釋,大家熟悉蘋果公司係因為佢嘅手機、電腦產品可以摸得到見得到,但蘋果利潤增長點其實在於App Store平台。神州控股嘅大數據業務雖然觸摸唔到,但如果代入蘋果,iPhone就等於智慧城市嘅場景,用嚟盛載智慧信息,每個市民都可以使用。iPad就好似公司嘅供應鏈,將智慧城市內嘅物與人聯繫起嚟。至於公司FinTech、工業互聯網等業務就如Mac機,畀學校和各行各業用家取用當中信息。神州控股擁有不同場景,好似蘋果有不同產品,而企業本身就等於App Store,係一個應用大數據嘅平台。
Maria經常被問到在內地嘅智慧城市業務有何競爭對手,佢話實際上係冇競爭者,原因係業內公司唔會同神州控股一樣,以城市首席技術官(CTO)角色切入業務。大部分公司都會按標書提供產品或服務,完成自己部分就會離開。神州控股作為城市CTO會由頂層設計做起,直至完成,一般需時兩至三年,之後並會駐守城市,可謂與城市共同成長。另外公司會按一個城市本身嘅基因和已有基建,為佢設計合適方案,唔會硬搬現成系統,或要求政府全套更換。能夠做到呢點,係依靠自主開發嘅「燕雲DaaS」和智慧城市3.0模式,亦成為公司獨特競爭優勢。
智慧城市業務上半年收入升近七成,毛利更升近兩倍。相信往後5G進一步發展,科技應用更普及和成熟,有助公司拓展業務。同時,業務發展亦令公司掌握更全面數據,因此日後會發掘更新嘅信息運用模式,令公司可以提供更貼近地方特色及需要嘅服務。另一方面,公司會將以往幫城市建立嘅平台產品化,以便將經驗套用到其他城市,可以加快前期發展,並提高新項目毛利。
另一項智慧產業鏈業務成績都不俗,收入按年升三成一,毛利升兩成二,分部利潤升八成一。至於神州信息收入持平,但新一代分布式核心銀行平台好受歡迎,現時六成內地商業銀行都有採用。
神州控股係一間百分百新經濟公司,最倚重人才,所以計劃向經營團隊授出購股權,但設定行使條件係二○二○、二一、二二年淨利潤要達到五億、八億和十二億元,相信核心人員努力之下,未來業績可以期待,而我更期待將來見到公司被納入恒生科技指數。