馬國明Po自拍問：有冇掛住我 湯洛雯學男友Hea覆「心心眼」
馬明和靚湯又喺IG個耍花槍，好閃！
馬國明（馬明）和湯洛雯（靚湯）自今年6月公開戀情後，經常於社交網晒「定情公仔」、「愛的手機殼」和「情侶Tee」放閃，而每次雙方出Po，兩人都必定點讚、留言隔空傳情，雖然一眾粉絲都大嗌又Sweet又羨慕，但近日有網民就發現馬明次次喺女友Po下留言，都「不多也不少」例牌貼出3個心心眼emoji，結果日前網民終於忍唔住出聲問：「你可唔可以換個表情？」、「專一人士連放個表情都要夠專一」，對此靚湯都沒好氣回覆3個打喊露emoji俾男友，睇嚟佢都嫌馬明交「行貨」好鬼悶！
有網民發現馬明成日留3個「心心眼emoji」Hea覆女友，靚湯似乎都開始嫌悶。
今晨輪到馬明於IG出Po，他貼出型仔自拍照並留言：「有冇掛住我……」唔知係咪同女友講o架呢？不少網民都笑言：「你問緊邊個？」、「靚湯掛住你咪得，使乜我哋」，高海寧亦搭嗲：「掛住靚湯多啲。」至於靚湯今次就以其人之道還治其人之身，學馬明齋留3個心心眼emoji，一班粉絲睇見紛紛笑說：「又係呢個emoji嘅」、「學會了」、「Mrs Ma做得好」、「耍花槍」、「愛的密碼」，連蔡思貝也表示；「你哋兩個令到我一早起身笑咗。」
馬明今日出Po問：「有冇掛住我……」
靚湯就學馬明Hea留3個「心心眼emoji」。
見靚湯以其人之道還治其人之身，一眾網民即讚做得好！
靚湯經常於IG暗中晒愛。
