為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 名人薈  > 名人熱話 2020 年 08 月 28 日

Amanda S. 甜心再出發

五年內經歷離婚、喪父及甜品生意失敗,再堅強的人也會感到沮喪,但台法混血名模Amanda S.(龍玥心)卻咬緊牙關一一捱過。
一度觸發起信心危機的Amanda ,去年希望藉改中文名龍玥心,以改善運程。結果絕跡甜品界近五年的她,近期自創千層牛角酥Ooonut,開設期間限定店,「呢個係一個Passion project,希望為香港人加油,為生活加點甜!」早前,她更應邀到倫敦拍攝旅遊特輯《神奇旅俠》,介紹英倫的潮人潮事,全面回歸。
二〇年過了八個月,有新甜品店、新男友的她,學懂更愛自己,做自己喜歡的事。女人四十,重拾自信,勇敢再出發。

忙着打理甜品店的Amanda S.,已連續工作數星期,她坦言很疲累,但非常享受過程。

 

半年限定

訪問當天,約Amanda在其上環的甜品店拍攝,由於店內不設堂食,早上十一時多,已見不少人在門外等候取餅,只見她在廚房出出入入,邊幫忙包裝,邊招呼客人,大熱天時,水也未有時間飲一口。「我已經連續工作五個星期,冇休息過!真係見諒!」說了幾句,她又走回廚房打點。
「一個朝早已經出咗十幾盒餅,我今朝八點已經喺度,無停過,我哋啲甜品係即日焗製。雖然幾個禮拜無休息,不過我好享受呀,因為我真係好鍾意整餅。」
做事一絲不苟的她坦言,做生意一定要親力親為,未知是否壓力大,看起來更為消瘦,「瘦咗三、四磅啦,都係維持一百一十磅左右,我真係喺廚房做嘢o架,雖然有同事幫手,但我每日都喺度,要監察住品質,有次唔夠盒,我親自搭車去倉攞,做生意係咁o架嘞!」

她將牛角包及千層酥結合,自創Ooonut,早前於ifc設期間限定店發售,很受歡迎。

 

千層牛角酥有兩款口味,包括雲呢拿味、朱古力味,其中朱古力是用Valrhona Guanaja 70%黑朱古力,甜而不膩,即時食用最好味。

 


自創甜品Ooonut那麼受歡迎,理應大力發展,Amanda卻只做六個月期間限定,問她會否覺得可惜,她斬釘截鐵地說︰「No!九年前開過甜品店,已經覺得餅店好難做,香港租金太貴,o依家啲材料費仲貴咗兩、三成,所以都係六個月夠嘞!如果真係想長做,就要自己搵個廚房,o依家租朋友嘅廚房,搞Pop up store,我覺得幾好玩,大家都開心!」
目標明確的Amanda直言,今次再涉足甜品界,純為興趣,也為分享快樂。「近年社會發生好多事,喺呢個疫情下,人人都唔開心。今年肯定唔會有Event,唔會有Show,咁點解坐喺屋企唔做嘢呢?咁我就諗做一樣嘢,可以同港人分享快樂嘅,就係做我最擅長嘅甜品, It's a passion project,唔係為賺錢!」
雖然上一間甜品店Petite Amanda已結業五年,但她緊貼IG小店熱潮,加上看到不少人都喜歡吃千層酥及牛角包,她於是將兩者二合為一,自創像冬甩的千層牛角酥,每天只限量發售二百個。「廚房加埋我得三個人,真係貴精不貴多!不過見到客人食得開心,我就滿足嘞!」