為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2020 年 08 月 26 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

賣糖水抑或改變世界?

有一個著名管理案例,喬布斯喺蘋果發展初期,希望搵一位能幹嘅管理人,幫助佢將企業帶到新高峰。佢屬意當時百事總裁史考利,問題係點樣說服一位大企業老總過檔呢間上市三年嘅新公司?喬布斯對史考利講,你希望賣一世「糖水」,定係加入我哋,改變世界?呢句話已經成為經典,而我從呢句「糖水」名言中睇到初創者兩大特點,第一係對自己和企業超級有信心,第二,創業初心係希望帶嚟改變。
香港有不少初創者,或者未能夠做到改變世界,但創業初心或多或少希望改變行業。有人形容初企顛覆市場,但我覺得改變係嚟自市場本身嘅痛點,或者未滿足嘅需求。最近訪問兩位年輕初創人,佢哋不約而同闖入兩個傳統行業,並打破舊有運作模式,以解決消費者面對嘅痛點作為切入點。

年輕初創者正在改變各行各業的營運模式。

 


先講今年四月獲得虛擬保險牌嘅OneDegree,公司創辦人之一及CEO郭彥麟(Alvin)同我分享,當初有進入保險業嘅念頭,就係見到行業原有模式之下,理賠比較慢,而且產品覆蓋範圍亦較傳統,保險公司運作更加同二百年前冇乜分別。於是Alvin同拍檔諗,邊方面可以做得比現有模式好,甚至要好十倍以上,例如投保和理賠係咪可以快十倍?如果做唔到,就寧願放棄諗過另外一啲方案,經過多輪Brainstorming,最後敲定以科技公司營運模式進入保險業。
基於呢個改變行業嘅想法,OneDegree獲發牌後兩個月,就推出香港第一隻寵物保險產品。Alvin解釋,全港有五十萬隻貓狗,係幼稚園同小學生嘅總和,主人根本就當佢哋係仔女,佢哋有病一樣會去睇醫生,但點解市面上冇寵物保險,主要係傳統做法計唔掂數。我講笑問Alvin下一步會晤會推出寵物壽險,佢好認真答話公司研究緊,如果主人離世要搵人照顧寵物,呢方面有冇辦法保?我期待佢下次同我講已經有新產品面世。
公司見到疫情下網購風行,最近同國際網購轉運公司 Buyandship合作推出貨運保障,以及免費海外退貨服務。兩間公司都係數碼港培育計劃支持嘅初創,經營理念相近,於是一拍即合。原來Buyandship已經成立六年,公司同其他網購物流公司唔同嘅地方,係自己「擁有」客戶。一般網購都由網站主導用邊間物流,最多有幾間揀,但Buyandshop聯合創辦人和CEO陳仁沛(Wilson)另有想法,公司希望能建立客戶群,客人去邊個網站買嘢都可以搵佢哋,甚至可以喺龐大客戶基礎上反過嚟同網站傾,可否為客人引入新產品。
兩間初創見到海外網購嘅痛點,就係買比較貴嘅產品時會擔心運送出現問題,而對於一啲要試嘅貨品又驚運到嚟自己唔鍾意。於是兩間公司決定將賠償額大幅增加到五萬二千美金,另外提供免費海外退貨,等客人放心海外網購。
兩間公司都希望利用科技和新思維帶嚟市場革新。其實無論係賣糖水定保險,做手機定係運貨,肯創新就有機會改變世界。