論人生的體會，有人說像苦瓜，要有閱歷，才懂欣賞當中的美。對李佳芯而言，是戲中、書中自有黃金屋。

「有啲書或者戲劇嘅句子、對白，或多或少都解答到一啲我對人生嘅疑惑。我到二十幾歲先睇《亂世佳人》，女主角（Scarlett O’Hara）經歷咗好多好多嘢，佢喺Ending嘅一句對白：『After all, tomorrow is another day.』。我覺得都係喎，原來無論人生經歷咗啲咩，瞓醒覺又係一個新開始，會釋懷咗。」

過去一年，於外人眼中，三十七歲的李佳芯要釋懷的事多了。原本劇接劇的她，有傳因一個IG更新，被TVB雪藏，令視后半年沒新作，傳聞會演出的劇集又被易角⋯⋯

沒有浪費每一個明天，也沒有花生友口中的忿忿不平，她充份利用Pop-up的悠長假期。「忙咗幾年冇停過，我見到自己有幾個月假期，就想做一啲自己一直好想做，但又未做過嘅事。有好多嘢，我諗咗好耐但冇實行，出書係其中一樣。一月疫情開始，我更加覺得自己冇藉口唔做。」

畢竟，明天又是新的一天，懷着正能量向前看，總不會失望。對吧？

 

無限挑戰

由大學做兼職模特兒，到〇八年加入有線擔主節目主持，一一年兼職拍港台劇集，再於一二年跳入TVB當藝員，一八年就榮升視后，履歷輝煌。
「入行做Model，完全為咗搵錢！我中學都有做過寵物店、打字員，讀大學生活費愈嚟愈貴，我唔想靠屋企人，就去Model公司睇吓，之後又真係有Job做。做主持嘅時候，我都未知自己想點，到三十歲先想做演員，就想做好佢。
「我做演員嘅目標唔係攞獎，但係攞咗獎之後，對我係有激勵作用嘅。我以前係一個冇乜信心嘅人，尤其是我唔係科班出身，又唔係生得靚，身形又唔係好好，所以我只係想做多啲唔同嘅角色，有多啲演繹方式俾觀眾睇，亦都挑戰吓自己。」
李佳芯給自己的挑戰，不只演戲，要多得忽然多出的假期，令她完成另外一項：出版著作《心之所往》。「出書對我嚟講係有意義嘅事，我唔係作家，讀書時候作文又唔係特別叻，但當係一償自己嘅心願，係值得嘅。有幾個月假期，我可以滿足自己。雖然出咗一本書，但我覺得離才女嘅路仲好遠。」

跟男友陳炳銓拍拖五年，二人性格相似，亦同樣熱愛行山，惟李佳芯仍未有結婚打算。

中學時代的李佳芯，試過打暑期工賺錢，初見「女神」外觀的她，並未開始模特兒生涯，而是在寵物店當店員。

衣服鞋襪執兩個胞兄手尾，校服亦不例外，最搶眼的，是那對充滿使用痕跡的白飯魚。

小時候愛跟兩個胞兄通山走，但小佳芯的皮膚還是比兄長們白淨，一看便知誰是妹妹吧。