為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 名人薈  > 名人專訪 2020 年 08 月 20 日

明德豐 鋌而走險

看到明德豐(Sherwin)總覺得熟口熟面,因為在大台的劇集裏,不時會看到他的蹤影,經常扮演醫生、法官、商人、經理等角色,最常做是「西裝友」,堪稱「特約王」。「公司好多時會叫我自備西裝,咁就唔使準備戲服俾我。反正我返工都係着西裝,直接過去片場就得,衫都唔使換。」
父親是已故億萬馬主及建築師明嘉福,大學畢業後,明德豐即接手家族經營的旅行社,大約三年多前才結束業務,之後他便跟好友鄧一君加入保險界,看中其工作時間靈活,既賺到錢又可繼續拍劇,「轉行做保險,同我廿年前開始加入影視圈一樣,個個都以為我玩玩下,無人估到我當年做特約演員,可以堅持到今日。對於做保險,我一樣投入,希望長做長有。」
人到中年,才鋌而走「險」,但他相信憑住一團火,一樣可在行內發光發熱。

他於三年前轉行做保險,每次見客前,會先準備好資料,好似記對白一樣,將資料全記在腦內,演好理財顧問的角色,「我去到拉斯維加斯、夏威夷都有人認得我,佢哋話記得我姓明,但唔記得我做過咩角色,但套套劇都有我份,哈。」

 

朋友驚咗我

訪問當日,明德豐先在銅鑼灣區見保險客,見他做足準備工夫,隨身帶備消毒酒精、口罩和小型空氣清新機等,他笑說:「呢啲都係太太幫我準備嘅!自從爆發疫症,公司開會好多時都變成網上會議,啲客唔係個個都方便出來,好多嘢都變咗喺網上做,只用whatsapp和電話傾,如果要簽名就郵寄,習慣咗其實都好方便,但有啲客都會堅持要見面傾。」
三年前,明德豐跟隨相識多年的好友鄧一君(John),轉行做保險,「我唔再搞旅行社喇,因為旅行社好難做,成日俾人走數。o依家人人都喺網上買機票,我哋唔夠人快,唔夠人平,好難做。於是我就想搵份長工,但希望工作時間比較自由,可以陪到三個仔女成長,又有空餘時間拍吓劇。當時John就叫我試吓考保險牌,點知又俾我考到喎,咁就入咗呢行。」
萬事起頭難,明德豐唯有用時間去證明自己轉行的決心,「開頭朋友都驚咗我,所以我唔會主動叫人幫我買保險,但一年後,慢慢開始有朋友問我有關保險嘅問題,屋企人亦觀察我,睇吓我係咪真係可以長做落去。我都明白,好多人怕買咗保險之後,個經紀做做吓唔做,份保單變咗『孤兒單』,所以我會堅持,希望俾到客人信心。我家姐同姐夫無限量支持我,將所有保險轉晒俾我搞。
「我每年都有開新單,我好記得o架……我第一張單係太太嘅朋友幫我買,佢話現代人生活有好多預計唔到嘅事,諗唔到一個唔買保險嘅理由,呢句話令我好深刻。」

 

他在《廉政行動》中飾演法官,與李成昌和陳展鵬同場演出。

 

在《畢打自己人》及《愛回家》中,他不時與羅樂林有對手戲。

 

明德豐欣賞很多資深演員,其中一位是許紹雄,戲內戲外都充滿戲味。