在演藝圈，發明星夢跟發展事業，僅一線之差，入行十三年的駱振偉，曾因而一度懷疑自己。
「〇七年玩新秀，我只係換一張入場券，去進入表演行業，但係入咗場，自己又唔識諗，唔識爭取機會，本地樂壇又萎縮，到頭來嘥咗張入場券。」
兜轉之下，他轉至主持行列再起步，十年下來，由2字頭o靚仔變成3字頭人夫，因一個《Chill Club》，高唱別人的歌，重燃他的歌手小宇宙，更為他帶來第一首屬於自己的歌，三十五歲，終於以樂壇新人身份出道。
「出到歌對我嚟講，成件事係大到唔係好知點處理，我花咗好多時間，叫自己唔好諗咁多。做咗咁耐主持，通常都係訪問人，呢家有機會做被訪者，係一件好奇妙嘅事，好似發咗一個好靚嘅夢咁。」
不是AV夢，也不是明星夢，等十年才再次得到樂壇入場券，駱振偉淡然說：「我唔覺得行咗冤枉路，我用自己嘅方法，行到去終點，我覺得都係值得嘅。」
值得與否，時間會說明一切。

 

不論婚前婚後，Katrine也努力融入駱振偉家中，他稱婆媳沒有糾紛，「佢哋唔係好溝通到。」

13年一遇

對一般路人而言，駱振偉大概是「ViuTV嗰個主持」，最近他因音樂節目《Chill Club》，得到上台高歌的機會，說他是唱家班、參加新秀入行，還曾經是「英皇娛樂」一員，路人自然是零認知。
「玩新秀嘅時候，我都已經廿幾歲，我知道自己唔係發明星夢嘅。而且報名之前，我已經做咗一年空中服務員，因為我知要入娛樂圈，生活唔容易，我就做一年嘢儲錢，儲咗幾萬蚊，諗住冇嘢做都可以搣吓。」
大學攻讀酒店管理的他，自以為長遠地規劃好殺入娛樂圈之路，但意外總是發生於意料之外。「當時唔係好識諗，真係會覺得自己懷才不遇，其實係我嗰時傻豬豬，唔識同人溝通，冇話過俾人知自己嘅目標，咁梗係冇機會啦！做空少儲嗰幾萬蚊，好快就搣晒，但係好好彩地，舊公司冇機會俾到我，都肯喺一〇年俾我揀走唔走，我已經即刻話走。咁啱當時nowTV因為《撳錢》recruit主持人，我冇再唱過歌嘞。
「離開咗舊公司，我直情好憎唱歌，因為唱歌係我一個唔係幾好嘅回憶，我盡量唔去觸碰。以前會喺屋企自彈自唱，有一段時間係冇咁做過，直至《Chill Club》之前，我都冇諗過自己會做歌手。」
一等，就等了十三年，今年因節目反應良好，令駱振偉終於有了自己的單曲〈成熟．不了〉。

駱振偉稱太太已在港居住了七年，今年剛合資格成永久居民，閒時她愛泡中國茶，他則樂於在家當「廢柴」。

1+2╱〇七年贏得新秀「金咪大獎」（即冠軍、右圖），駱振偉要多等十三年，才有機會推出第一首歌〈成熟．不了〉。