為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2020 年 08 月 18 日

關慧玲

《東周刊》社長兼總編輯。

富貴如浮雲

數上星期最沸騰話題,非壹傳媒(0282)股價大上大落莫屬。Y君手上一直揸住的一批蟹貨亦趁機甩到身。不過佢話,揸住呢批股票二十幾年,曾經市值千幾萬,跌到最低時得番兩萬幾蚊。本來佢當發場夢算了。點知近日壹傳媒創辦人黎智英被拘捕,壹傳媒股價離奇拗腰上,佢好彩執番幾十萬,足證富貴如浮雲。
Y君係壹傳媒原始股東,手頭大概有二百幾萬股,當年股價最高去過五蚊,市值逾千萬元。話說Y君離開一仔後,同舊同事吹水,舊同事話肥佬黎到處同人講,話隻股會上到十蚊;另一單更勁爆,傳來自一段電梯偷聽對話,話有一仔人聽到執行董事同另一高層在電梯裏面細聲講大聲笑,一口咬定五蚊一定變五十蚊。呢段所謂嘅「內幕消息」傳到Y君耳中,自然雄心萬丈,自然希望有咁耐等咁耐,到四十五蚊先沽貨,於是一直揸住,「之後咪睇住佢不斷跌,然後五併一又再跌,最近每股七仙幾,都無眼睇。」佢話,每當有人問起佢呢段「傷心事」,都係笑吓就算。

黎智英上周一被警方拘捕,其間曾帶他到西貢協助調查。

 


直到上周一,壹傳媒老闆黎智英被警方拘捕當日早上,佢在睡夢中被手機短訊嘈醒,原來係各方好友提佢一仔股價抽上,當時每股已經六毫,佢慢條斯理洗面,沖埋杯咖啡再坐低睇市,點知股價已經衝上九毫子,佢即刻成個人醒晒,拿拿臨放貨,最後平均價一蚊沽晒,「唔係下午工作纏身,出貨價仲可以高啲,不過都已經好開心啦。」好多人都替佢高興,當然同時搵佢請飲茶啦。
壹傳媒呢隻股曾經紅極一時,炒得相當瘋狂,筆者認識唔少人當年本來兩、三蚊時沽了貨,但被利好消息衝昏頭腦,在高位四、五蚊時再追入,跟着坐艇坐足二十年。所以話投資這回事,除了講一己判斷評估上落車時間,更要講運氣,有誰會估到一間上市公司創辦人出事,反而會谷起股價的呢?Y君真是行運行到腳趾尾了。