【阿倫加持】帖文讚係子華星爺混合體 王浩信唔信邪轉發分享

王浩信喺新劇《反黑路人甲》獲譚校長「加持」激讚。

由無綫力捧小生及小花王浩信、張振朗、馮盈盈等主演嘅無綫新劇《反黑路人甲》播咗兩集，因為以漫畫手法拍攝，都有唔少笑位，喺疫情下觀眾睇吓得啖笑，都算可以幫到觀眾放鬆一吓嘅，就連譚詠麟（阿倫）都有捧場，喺微博留言激讚王浩信劇中角色「張細倫」係黃子華、周星馳（星爺）嘅混合體，仲話故事發展得愈嚟愈精彩。他說︰「一連兩日看了無線（綫）新劇：《反黑路人甲》，覺得不錯。整個風格似漫畫拍攝手法，人物多而不亂，各人性格鮮明且故事入戲快，編劇組應記一功。主角王浩信的角色有黃子華及周星馳的混合體，相信故事發展會越（愈）來越（愈）精彩 ​​​​。」

不過，上月初阿倫幫梁漢文（Edmond）「加持」，邀請Edmond同現任葵青警區指揮官謝振中一齊影相，事後阿倫將三人的合照放上微博，梁漢文頓成網民戰靶，相當大鑊！但，王浩信無懼校長的「燈神」威力，還轉發對方的帖文，寫道:「嘩！多謝校長鐘意睇反黑路人甲。」

王浩信得到前輩讚賞梗係開心啦！

上月因為呢張合照，搞出被網民鬧爆風波，梁漢文梗食真係陰功豬。

王浩信喺新劇《反黑路人甲》中演得生鬼，被指有望再奪視帝。