為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2020 年 08 月 12 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

疫情的蝴蝶效應

今年,索馬里輸往沙地阿拉伯嘅牲口大幅減少,由於牲口佔索馬里總出口四分之三,其中七成係運去沙地,所以預計當地經濟會大受打擊。尋根究柢,原來又係同疫情有關。每年麥加朝聖都有來自全球回教徒參加,上年信眾達到二百五十萬,期間需要大量牛羊肉作為食糧,因此朝聖之前幾個月係牲口運往沙地嘅高峰期。今年因為疫情關係,沙地嚴格限制進入麥加人數,連帶所需食物亦銳減。
新冠疫情嘅影響,過去數月被廣泛討論,雖然結論不一,但影響深遠係不爭事實。除咗表面影響,近期亦有人討論疫情嘅蝴蝶效應,例如上面講嘅索馬里出口受創等。亞馬遜雨林一隻蝴蝶拍翼,兩星期後引起美國德州一場龍捲風,呢個講法本來係由氣象學家提出,用嚟解釋地球空氣系統,但用於分析事情嘅環環相扣,非常合適。好似有學者認為希特拉嘅冒起,可以追溯到凡爾賽條約(導致德國巨額賠款)和大蕭條,研究蝴蝶效應可以令我哋睇得更遠。
一場疫情令大家意識到現今世界聯繫有幾密切,骨牌效應亦更加顯著。疫症爆發只係拍翼開始,最終會引發乜嘢漣漪?最近讀到一篇文章,對疫情蝴蝶效應作出六大預測,其中一項係「糧食民族主義」。疫症爆發初期,好多國家出現短期防疫和糧食物資短缺,因此疫情過後各國必定會加緊儲糧,而另一方面糧食輸出國又會收緊出口,影響正常糧食貿易,對於依賴糧食入口嘅國家更可能造成恐慌。俄羅斯在二○一○年曾全面禁止穀物出口,引起全球市場震盪,今次疫情期間暫停出口亦引嚟一陣麵粉搶購潮。為免出現食物危機,「國家級囤糧潮」似乎無可避免。

疫情爆發終會引發漣漪,其中一項預測是「糧食民族主義」。

 


另一項預測關乎人口移動。文章指如果將國家地區大致分為醫療較佳嘅綠區,以及醫療落後嘅紅區,可以預見疫情後大量紅區人口會想移民到綠區,但富裕國家一般會希望接收技術或投資移民,以支撐本地經濟復甦及人才短缺。當條件較優越嘅移民進駐後,會推高當地生活成本,因此會令到當地經濟條件較差,或者欠缺技術嘅本地人無法負擔一線城市生活,因而流向生活指數較低嘅省市,甚至國家,可以話一波移民潮將引發另一波。
全球民粹主義抬頭,中美「分手」(Decoupling)之下,有一個較好嘅現象係疫情令「科學外交」萌芽。由於疫情緊張,多國科學家合作研究疫苗,最終如果能夠配合遠程醫療和本地診所網絡,將有助為全球提供可負擔嘅醫藥。假如能夠喺呢個基礎上繼續發展,加上克服各地藥物監管問題,甚至可能解決藥物研發成本高昂呢個老問題。
文章以十四世紀黑死病作為總結,當年疫情過後,由於勞工短缺,逼使地主大幅提高農戶和勞工薪金,間接為階級分明而僵化嘅社會引入流動性,引發嘅漣漪跨越幾個世紀。其他專家有不同預測,好似美元地位旁落、綠色投資加速發展等,種種「混沌」分析無論準唔準,都有助及早分析預防,增強抗逆力。