為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2020 年 07 月 28 日

關慧玲

《東周刊》社長兼總編輯。

餐飲業大災難

疫情仍未受控,本星期三開始食肆更要全面禁止堂食,全部外賣,飲食界叫苦連天,話睇來今次真要執笠。
一位飲食界老行尊講起,別以為餐飲業易做,佢以茶餐廳為例,係要由早上七點不停做到晚上九點,早午晚三餐再加下午茶仲要不時轉款式,全店要坐到迫爆兼且客如輪轉,才叫做有微利,之前禁晚市堂食,茶餐廳立即要吊鹽水。
佢話,如果是酒樓等規模較大的,一般而言晚市較好賺,因為放了工時間充裕啲加上家人朋友一齊食,餸菜也叫多一點,所以晚市堂食佔餐廳營業額七成,????家禁埋午市,而外賣是遠遠不及堂食的營利。唔少酒樓早前攞咗政府保就業基金不能裁員,佢聽聞因為禁堂食呢招太辣,有的寧願畀番錢政府都要裁員。
有餐廳東主大呻,話去年六月反修例風波開始已經無啖好食,今年年頭新冠疫情第一波時,佢地向政府陳情過,如果一定要規管食肆經營,就要快狠準,畀大家知道嚴厲措施屬一時之策,之後有條生路可行,政府同時要宣布支援行業的方法,雙軌並行。但政府限聚令好似擠牙膏咁,兩星期之後又加兩星期,之後鬆一排,近日再禁晚市繼而禁埋午市,作為餐廳老闆,感覺就好似每日被割一塊肉,凌遲處死。難以外賣的堂食例如日本刺身、鐵板燒、火煱等,肯定率先頂唔順。
稻苗學會會長黃傑龍(見圖)亦批評,疫情之下人人都受害,但政府近日不時公布確診者去過那間食肆,業界免不了被污名化,其實中招個案可能在的士、住所大廈、或者接觸銀紙受到感染,「只禁堂食而無其他周邊措施配合,例如加強邊境防疫,不會有成效。」
佢話禁埋午市堂食相信整個行業生意將大跌九成,有餐廳水電煤都未必交得起,寧願暫時停業兩星期,或者只做星期六、日,不過就好難預計進貨量,佢形容今次係業界災難。「人工佔食肆開支三成,不少食肆捱一個月已蝕去一年的盈利,預計整個行業受影響人數超過三、四十萬人。」
疫情第三波爆發有如水銀瀉地,食肆吊命,而連鎖行業洗碗、食材批發、運輸等亦受波及。一句到尾,長痛不如短痛,希望真的如醫學專家所言,痛埋呢一次,香港百業再也受不起折騰了。