愛情路上，有誰不渴望細水長流？真正達到目標的，又有幾多人？仍在努力中的，有張紋嘉（Crystal）跟男友林子傑（Ronald）。從Hotcha出道的她，一六年因舞台劇認識男友，「初時識佢，覺得佢好搞笑、好多嘢講同好嘈囉；到o依家一齊咗三年半，我覺得有佢喺隔籬就會好安心。」
不是偷食，是真安心。她安心到讓男友參加真人Show《調教你男友》，到南丫島進行七日被調教生活。林子傑稱：「調教即係勞改、勞役我哋呢啲唔合格嘅男朋友⋯⋯」
女友即護航：「唔好話唔合格，合格嘅！可以再高分啲咁樣囉。」
訪問期間，不乏如上的你一言我一語，而女友口中「好搞笑」的他，常以女友搞Gag，「我細細個就睇佢演出，我嘅人生Theory係，有冇見我唔係好白？記住！做人要〈不要防曬〉（Hotcha名曲）！」
當男友第五次用自己的歌搞Gag時，張紋嘉的反應是：「你o依家要搽o架嘞，唔係啲皮膚會老得好快。」附有輕撫男友的臉。
Whatever啦！這樣的環境，防曬無用，要戴眼鏡防閃。

 

一八年Hotcha十周年時，林子傑表白為「Hotcha死忠」，張紋嘉自然照單全收。

非勞役調教

對於參加真人Show，張紋嘉本抱着讓男友學一技之長的心態。「因為節目組話俾佢（男友）學一項專長，我就諗，佢唔識音樂，俾佢學吓彈琴都好喎。之後就話要入Camp，做嗰啲嘢係佢平時都做嘅，好似擔泥（林：「唔係擔泥。」）、行山。」
入Camp不是擔泥，但林子傑難免忐忑，「我未做過真人Show，加上『調教』有勞改，勞役意味，搞到我有啲戰鬥格咁入去。」
拍拖三年多，雖然二人並未正式同居，但由於他們各自獨居多年，要相見並沒土地問題，所以許可的話，他們會天天見面。
「但係佢被調教嗰七日，我哋完全冇聯絡，所以可能會有一啲嘢，撩起佢對呢段感情嘅感受；又會講到一啲平時對住我，唔會講出嚟嘅嘢。
「好似佢同阿祖（節目主持梁祖堯）演即興劇，阿祖扮我，話要同佢分手，佢都可以演到講咗覺得佢收入少，我會同佢分手咁。我又點會咁呢？」
從勞役變成盡訴心中情，林子傑也始料不及，「我估計個Show會係娛樂性強啲，點知同阿祖，仲有其他男朋友，飲住酒傾傾吓，會變得咁感性。」
於二人的關係中，雖然金錢的戲份並非特別重，但三年半下來，林子傑也有觸及女友底線的時候。「我試過一啲好少嘅事，爭啲同一個男人喺街頭打交，因為佢拉住我，令我之後將脾氣轉嫁到佢身上，仲同佢講：『我o依家想打你！』」
張紋嘉接着說：「呢句真係踩到我底線，但我好快就冇嬲嘞！（林：『食完餐飯，過咗個零鐘佢就冇事。』）我知佢衝動囉，佢好二元，一就一、二就二，冇中間嘅地方，好有原則，但係呢個亦係我欣賞佢嘅地方。」

 

去年九月，林子傑到英國愛丁堡公演，張紋嘉當起跟得女友，二人於當地遊歷，製造共同回憶。

二人因舞台劇《斷到正》而認識，一七年正式拍拖後，他為女友主演的舞台劇《進擊の廢能量》任執行導演。