擔心被「私了」 九巴唔接政治廣告
九月立法會選舉臨近，街頭唔少大廈外牆、巴士、小巴以至的士，再次成為搶手廣告位，但經歷反修例風波，黑衣人到處燒車、「裝修」店舖，唔少廣告位持有人都被嚇怕。以九巴為例，據聞月前已拒收政治廣告，擔心帶立場嘅廣告會招來報復式燒車或者燒巴士站，有錢都唔賺。有政界中人透露，部分大廈業主亦擔心被掟汽油彈，就算有超正電視屏螢幕位亦拒絕出租給有政治成分嘅廣告。
上屆接唔少選舉候選人廣告嘅的士車行，今年亦相當揀客，唔係「逢人都接」，不過亦有部分貨櫃車主無有怕，照樣出租，因為車身夠晒大，反而成為另類之選。
民建聯租來大貨車為競選造勢，黨主席李慧琼及全國人大常委譚耀宗更陪同陳恒鑌（右二）報名；新西區已報名候選人還有熱血公民鄭松泰。
