為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2020 年 07 月 22 日

救亡新方案 海洋公園研拆件式收費

急關頭終獲政府撥款續命嘅海洋公園,暫時逃過執笠命運,但未來點生存要靠搵到「吸水」絕橋。據悉園方高層最近一直聽取專業人士畀橋,有人就提議樂園設施拆件式收費,再配合免費入場,務求先谷番起人氣,再謀轉營。
將設施拆件式收費呢條橋唔算新,年前有保險公司喺中環海濱搞嘉年華,就成功以免費入場方式吸引大批人流,雖然入場後每項機動遊戲同攤位遊戲都要逐樣收錢,但入得場嘅客人見入場費已免,唔介意畀三幾百蚊買個高興,所以零入場費模式嘅嘉年華反而大收旺場,海洋公園管理層覺得有得諗,正考慮構思仿效,實行谷番旺個場先。
但唔使錢入場唔代表玩乜都要畀錢,公園考慮將部分有環保同保育元素嘅設施免費開放畀市民參觀,咁樣有助園方建立合家親形象之同時,日後繼續問政府申請撥款都出師有名。
改變入場費模式只係前菜,改革公園嘅商業元素先係主菜。消息人士透露,管理層正度緊將餐廳外判,園方從收益中分成,「公園為咗保持環保形象,旗下餐廳都選用環保食材,但咁做令營運成本大增,售價唔平,客人自然嫌貴而唔多想幫襯;若然行外判呢招引入更多食肆品牌,就可將公園打造成星級美食熱點,吸引力大增。」
除此之外,有人亦留意到公園傍晚後人流遜色,白白浪費交通便利嘅海洋公園地鐵站,獻計構思舉辦小型演唱會或觀星活動,有助吸引年輕一族入場,洗去「老餅」形象。
眾多救亡新方案到底邊個會跑出?據知管理層仍在積極計劃中,「管理層明白雖然部分港人希望海洋公園保留主題公園嘅形象,但佢哋深知呢條路再走落去,絕對行唔通,所以大刀闊斧改變經營模式,係唯一嘅出路。」

立法會議員謝偉銓(左)與業界成立關注組,早前會見海洋公園新主席劉鳴煒(中)交流如何為公園重新定位。

 

為吸引遊客,海洋公園或破天荒試行不收入場費吸客。

 

管理層正研究將機動遊戲作拆件式收費。