為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2020 年 07 月 22 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

新經濟明星股

財新BBD中國新經濟指數(NEI)六月份升至三十二點一,代表新經濟產業貢獻國內GPD百分之三十二點一,係二○一七年八月以來最高水平。升幅主要反映資金投入分類上升四點六個百分點。NEI喺一六年推出,追蹤十個新經濟行業。至於反映香港、內地和美國上市中國新經濟公司表現嘅恒生中國新經濟指數,於截稿日一年內亦升逾四成六。
「新經濟」並唔係新名詞,睇資料最早出現喺八三年一期《時代雜誌》封面,形容世界正由重工業過渡到科技為基礎嘅經濟體。到九十年代後期科網泡沫形成,新經濟就經常被提及。經合組織喺○一年發表《新經濟:熱潮之後》(New Economy: Beyond the Hype)報告,研究組織內國家增長趨勢,希望搵出增長背後嘅結構性改變和來源。其中,澳洲、愛爾蘭和荷蘭喺九十年代嘅增長特別強勁,美國和其他幾個國家增長都有升幅,但日本和大部分歐洲國家增長就慢咗落嚟。研究發現,增長幅度各異,其中一個原因係國家喺資訊通訊科技(ICT)軟硬件上嘅投資有不同取向。
港股方面,以往由傳統舊經濟股主導,兩年前港交所進行改革,容許未有盈利生物科技公司、同股不同權(WVR)公司上市,以及接受公司來港第二上市。新規例實施至今年四月為止兩年內,有八十四間新經濟公司來港上市。四月份時新經濟股佔比仍然只有一成七,但有分析估計五至十年後佔比將升至三成到三成半。

香港上市嘅騰訊、阿里巴巴、京東和網易,就有投資者組合成「TANJ」,都係一個象徵。

 


一三年有美媒將Facebook、Amazon、Netflex和Alphabet (Google)合稱「FANG」,之後有人加入Apple成為「FAANG」,高盛又加上Microsoft而拎走Netflix變成「FAAMG」,美銀就加AVGO和Adobe合成「FAAANG」,各適其適,但萬變不離其宗,所選股份全部增長驚人。投資界不斷發掘新嘅高增長新經濟股合成新FANG、新新FANG,最近我就見到有人將五隻潛力股組合成「SMART」。
實際上FANG已經成為新經濟明星股嘅代名詞,「成份股」各有所好,可謂人人心中都有一個FANG。中國方面,有人稱其新經濟明星為中國FANG,但亦有投資者揀出百度、阿里巴巴(BABA)和騰訊合稱「BAT」;而香港上市嘅騰訊、阿里巴巴、京東和網易,就有投資者組合成「TANJ」,其實都係一個象徵。
美國S&P 500由○九年低谷到今年初上升差不多四倍,FANG係重要推手,現時佔S&P 500總市值五分一。如果比較科技股主導嘅Nasdaq 100同期升逾七倍,新經濟股嘅動力非常顯著。
不過,新經濟股並不等如新經濟公司本身。雖然股份普遍做好,但業績並非一面向好,例如亞馬遜已預警會有巨大虧損,Facebook和Google亦見到廣告潮開始減退,而蘋果今年首季賺一百一十億美元,但十年來首次唔作出盈利預測。我覺得新舊經濟股份雖然估值方法唔同,但總不能完全脫離基本因素,投資者最好做足功課至揀選自己嘅FANG組合。