為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2020 年 07 月 15 日

重複投票 無核證身份 民主黨初選敗陣隨時反枱

九月立法會選舉如箭在弦,民主派上周末一連兩日舉辦初選,聲稱有逾六十一萬人投票,揚言佔全港已登記選民嘅百分之十三點七。截至周一五點嘅初步點票結果,民主黨得票之低令人意外,參選人幾乎全軍覆歿,胡志偉、林卓廷、黃碧雲、尹兆堅及涂謹申均低票包尾或尾二,涂謹申在「超區」只得四萬幾票,比排頭位嘅鄺俊宇有接近二十六萬票,輸足九條街。
泛民今次初選一直是非不斷,尤其係傳統泛民同本土派之間嘅矛盾,拉票期間有個別選區一度出現各參選人喺街站互相對罵;喺黃埔港鐵站外嘅拉票街站,更出現三個參選人嘅助選團一列並排,擺咗幾個大喇叭或揚聲器,各自嗌咪拉票鬥大聲,嘈到拆晒天。
不過更重要嘅係,有投票人話投票時無對身份證都投到票;亦有人投咗多票都冇問題。另一名投票人更指出,投票時填錯身份證一個數字,但工作人員核對時並無發現有錯。兒戲事件陸續有來,有網媒記者實地測試,竟然喺兩日間成功投到三次票,難怪有網民質疑選舉結果嘅可信性,諷刺呢場大龍鳳只係得啖笑。
初選程序漏洞百出,唔少票站多次出現重複投票,有份負責協調初選投票嘅區諾軒就話只要愈多市民參予投票,就可中和機制漏洞帶來嘅效果。但有網民質疑漏洞就係漏洞,何來中和之理。話口未完,區諾軒上周六(七月十一日)亦承認鳳德邨同慈樂邨有人成功重複投票,周日亦出現類似個案。
而民主黨早喺初選前夕公開發炮,批評初選系統有六大重要漏洞,包括投票人無法得知自己是否被冒認重複投票,亦質疑票站職員有機會盜用選民資料投票等。此話一出,本土派即時反擊,參加新東初選嘅劉穎匡就暗寸民主黨,話佢哋喺初選前提出大堆問題,就係一旦輸咗,都可以反枱唔認帳。講到咁白,本土派跟傳統泛民到底有幾願意「齊上齊落」,真係大家心照。

民主黨喺初選中,得票率極低,只有鄺俊宇(右三)及許智峯(左二)高票勝出。

 

民主派稱初選有逾六十一萬人投票。

 

投票人士需喺票站外以手機掃一掃二維碼。