為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2020 年 07 月 08 日

擁千萬元私樓 鄺俊宇違規無申報

屋邨仔出身嘅民主黨立法會議員鄺俊宇,原來喺今年四月,已經升呢做咗千萬豪宅業主,以一千零三十多萬買咗大角咀新盤「利奧坊.凱岸」一個實呎四百一十七平方呎嘅單位,計返呎價都要二萬四千七百元,認真大手筆。
不過,翻查文件,鄺俊宇早喺一八年買入該單位嘅樓花,以至最近收樓,一直仲係以天水圍俊宏軒嘅公屋做申報地址,包括佢揸開架車嘅登記地址,都係報住喺老家。佢正式做業主已經兩個幾月,唔通真係掛住裝修或者搬屋,忙到唔記得申報?事關立法會網站仲顯示佢一六年申報嘅舊資料,當時佢係話自己冇物業。
身為立法會及區議會「雙料議員」嘅鄺俊宇,月入超過十一萬元,早喺一六年,房委會收緊公屋富戶政策下,佢一直被指係富戶。當年佢就話「不排除自行搬走」,但好明顯到現在仲係報住屋邨,未知佢係咪仲保留公屋戶籍呢?
民主黨成日喺立法會以監察政府之名,鬧政府做呢樣唔掂,做嗰樣唔啱,但輪到佢哋自己呢,就可以犯錯,可以違規,只准州官放火,不準百姓點燈?
根據《議事規則》第八十三條,身為立法會議員,名下所持有物業、任職公司董事或收受任何利益都要申報。如果有變更,議員也要在十四天內向立法會秘書處登記,畀公眾可以在立法會網站內查閱,讓公眾監察。
立法會嘅議員個人利益監察委員會,若收到議員無申報其個人利益投訴就會調查,之後向立法會提交報告,建議點樣處分。過去,民主黨前立法會議員何俊仁跟實政圓桌田北辰先後因無申報公司股份利益而被投訴。雖然佢哋個案都被監察委員會裁定「部分成立」。不過,委員會當時都唔建議處分。未知係咪咁,鄺俊宇就在利益申報上咁「唔上心」?

鄺俊宇身為立法會及區議會「雙料議員」,月入超過十一萬元。有關他無申報置業一事,至周一截稿前,鄺俊宇仍未回覆本刊查詢。

 

今年四月,屋邨仔鄺俊宇以呎價二萬元上車成為千萬豪宅業主。

 

 

 

鄺持有的私家車登記住址為天水圍俊宏軒一個公屋單位。他在立法會仍申報無物業。