為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2020 年 07 月 01 日

狗仔隊纏身 採訪車護航 黎智英自食其果

專派旗下刊物「狗仔隊」跟蹤目標人物,搞到神憎鬼厭嘅壹傳媒創辦人黎智英,近排聲稱被「狗仔隊」跟蹤,可謂自食其果。本刊上周去佢家門前睇過,只見幾部似係「狗仔車」嘅私家車長時間停泊喺路旁,而肥佬黎則出動旗下《蘋果日報》嘅採訪車護送佢出入,同佢以往聲稱「如果沒做壞事,為甚麼要怕人家偷拍」嘅寸嘴言論,擺明係自打嘴巴。官司纏身嘅黎智英,事業亦大插水,佢份《蘋果》經營困難,唔單止無乜廣告,就連訂閱數都插水,黎更自爆私人墊支五點五億港元撐住,事業、家庭都碰着黑,認真四面楚歌!
黎智英近排聲稱已連續十幾日被廿四小時無間斷跟蹤,佢接受傳媒訪問時聲稱「到底做嘢係我自己做,唔係我太太,唔係我啲仔女,希望唔好殃及家人」。到底係畀人跟蹤還是杯弓蛇影?可能因為「驚過龍」,黎智英呢排出入都搵《蘋果》護送,仲吩咐要用前後車Cam全程影住佢出入之餘,亦要反拍後面的可疑車輛,然後將條片放上《蘋果》嘅網站。

頭頭碰着黑嘅黎智英(右三)近日官司纏身,目前有四宗案件在身。

 


呢個舉動令網民啼笑皆非,事關對「狗仔隊」如此大反應嘅黎智英,正是本港傳媒最早引入「狗仔隊」嘅人,為追求銷量,旗下《蘋果日報》同《壹週刊》廿幾年來不斷全天候跟蹤目標人物,揭露他人私隱,更將其家人大起底,搞到唔少畀跟蹤人士飽受精神虐待,聲討其沒有道德底線,但黎智英闊佬懶理,為拯救陷入財困嘅壹傳媒,不顧一切繼續以誇張手法追尋點擊率,希望吸引廣告商救亡。
可惜無底線揭別人私隱嘅手法無助挽救插水嘅業務,過去六年來至少摺埋九份雜誌及報章。壹傳媒早喺今年二月底傳出裁員消息,三月中仲發埋內部通告話要凍薪。為咗吊命,台灣《壹週刊》紙本前年四月停刊,今年二月底連網上版都結束埋。因為網上業務危危乎,迫使黎智英月前出片自爆網上訂閱量「插水」,乞求市民訂閱助佢續命。
不過救亡措施無助壹傳媒股價繼續插水,近月股價更急瀉至再創新低,截至六月三十日,股價跌穿埋零點一元,股民大叫慘不忍睹。
生意王國幾近崩盤,黎智英還官非纏身,目前有四宗案件在身,共面對六項控罪,包括佢於三年前涉嫌刑恐記者案,以及三宗於一九年發生嘅未經批准集結案。「港區國安法」 通過後,有傳媒稱黎智英快將被捕,但佢否認準備着草,揚言「我不會走!」答得咁口爽,網民話不妨拭目以待嘞。

壹傳媒頻頻傳出裁員消息,網上業務更是危危乎。

 

黎智英稱廿四小時被人跟蹤,又指住宅外停泊了幾輛可疑車。