為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2020 年 06 月 25 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

ESG投資贏在危機時

近年備受熱捧嘅可持續投資,理念係分析和作出投資決定時加入環境、社會和管治(ESG)考慮。ESG呢個名詞首次出現於二○○五年一份名為《Who Cares Wins(關心才會贏)》嘅報告內,事源係○四年聯合國時任秘書長安南寫信畀五十間金融機構行政總裁,邀請佢哋參與一項全球契約之下嘅新倡議,○五年報告出版,○六年聯合國正式推出責任投資原則(PRI),之後一年再推可持續證券交易舉措(SSEI)。
ESG投資由提出至今十五年,但真正起飛在呢兩三年間,有估計現時投資總額超過三十萬億美元,即使疫情全球爆發都冇令投資停頓,反而見到資金穩定流入。疫情開始至今,見得到ESG投資回報表現高於平均,因此ESG唔單止係責任,仲可以令企業喺危機之中展現更強嘅抗逆能力。全球暖化、國際局勢緊張等,將會令極端氣候和惡劣營商環境成為新常態,宏觀風險因素變成日常營運挑戰,可以預見投資者將會越加看重上市公司嘅ESG投入。

港交所已經實施ESG披露,雖然仍有上市公司未能全面達到披露要求,始終邁出第一步。

 


香港交易所已經實施ESG披露,雖然仍有上市公司未能全面達到港交所嘅披露要求,但始終邁出第一步。中國監管機構亦已逐步強制要求上市公司披露ESG信息,而內地企業希望得到國際投資界認受,不但要作出披露,更加要做到同國際標準接軌。
目前內地企業ESG披露水平如何?中國平安保險(2318)屬下平安數字經濟研究院上星期出咗份報告,分析新冠疫情凸顯ESG表現對企業長期價值嘅影響,不過國內ESG披露質量未夠高,會影響長遠發展。例如滬深300企業中只有八成五發布一九年ESG報告,雖然比較一三年嘅五成四為高,但其中僅得一成二報告經第三方審計。
彭博分別對滬深300、香港恒生、美國標普500、英國富時100、澳洲ASX200、日經225和韓國KOSPI200等指數成分股作出ESG披露方面嘅比較,以一三至一八年期間平均得分計,滬深300喺ESG披露範圍和質量上排名最低。
平安研究報告分析,滬深300公司ESG披露得分低,其中一個原因係好多企業並冇精簡嘅內部數據收集流程,以至未能有效收集詳盡高質量數據,尤其對擁有大量子公司嘅大型企業,用人手收集跨公司數據,質量一定會下降。因此報告建議公司建立覆蓋企業嘅自動化數據收集系統,好似中國平安本身就有一套AI-ESG信息管理平台,根據不同監管機構五百幾個ESG指標,全年自動收集數據,監測變動,並與同業比較。呢個平台令中國平安ESG報告編制流程縮短二十二日,今年係全球第一批發布報告嘅金融企業。
另一方面嘅問題出自監管和評級架構。現時滬深300公司需要遵循九套不同金融及非金融監管機構嘅披露指引,加上評級機構要求和評估框架各異,令公司難以迎合不同要求,並會出現不同評級機構給予好大差異嘅評分。報告於是建議監管機構推出統一指引,另一方面公司亦應該為ESG披露進行審計,提高國際投資者對中國企業嘅信心。最後當然係投資者發揮本身嘅影響力,用投資行動支持ESG。