為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2020 年 06 月 21 日

撻着2個月見過家長 馬國明親爆秘嗒湯洛雯內情

現年四十六歲的「筍盤」馬國明,於去年四月「安心偷食」事件曝光後,便跟黃心穎分手,不經不覺已單身一年多。不過,原來他已成功「破dry」,暗撻三十三歲的無綫小花湯洛雯,兩人更已秘密拍拖兩個月。
上周五(十二日),兩人被影到前後腳返回女方的香閨,短聚四小時後,晚上同步在社交網貼出一張獨角獸與小馬毛公仔的合照,高調公布戀情。翌日,馬國明如常為新劇《BB大晒》開工,受訪時親爆與湯洛雯的感情狀況,冧爆表示兩人早有共識隨時公開,並坦言雙方已見過家長:「阿媽都好鍾意佢(湯洛雯)。」看來兩人發展神速,馬國明是甘願為湯洛雯「封盤」了!

網上認戀後,馬明返回無綫電視城開工。受訪時,他親爆與靚湯早有共識,幾時被影到,便會公開戀情。

 

拍拖兩個月的馬明與靚湯,日前被爆同返女方的香閨「蜜」會四小時後,他們隨即大方承認戀情。而「湯馬戀」更受到全城祝賀,認為兩人郎才女貌,非常相襯!

 

連環啜定情

四年後便入「五」的馬國明(馬明),被爆撻着年輕十三年的湯洛雯(靚湯),並已秘密拍拖兩個月。上周五(十二日),兩人被拍到前後腳返回女方位於紅磡的香閨,短聚四小時後,晚上七時許,他們再雙雙步出,結伴前往附近的商場購物,全程默契十足;跟住,齊齊再折返靚湯的香閨。事隔兩小時後,兩人在凌晨同步於社交網,貼出一張獨角獸與小馬毛公仔互相依偎的合照,還留言:「謝謝關心!」借公仔甜蜜「放閃」,公開認戀。
其實,兩人早於一六年合作劇集《心理追兇Mind Hunter》時結緣,劇中靚湯飾演馬明死去的女友,更有多場咀嘴纏綿的親熱戲,疑似戲假情真早已「過電」;不過,當時雙方都各自心有所屬,故未有進一步發展。
獲得全城祝福新戀情的馬明,翌日(十三日)春風滿面地現身無綫電視城,為劇集《BB大晒》開工。他大方受訪,並談到以情侶公仔合照認愛相當有心思:「係佢(靚湯)整嘅,佢好鍾意獨角獸,小馬我諗大家都明,但張相影咗好耐,我哋之前有共識,幾時畀人影就幾時講,我哋都好隨緣。」問到二人拍拖多久?他憶述:「我哋拍完《心理追兇Mind Hunter》後唔係好多聯絡,直至最近,唔知點解好自然傾番偈,覺得好啱傾喎,可以發展吓。」
談到拍拖「斷正」時表現淡定,馬明自爆一直沒有避忌,兩人還經常在公司撐枱腳:「因為之前有共識,幾時影到就幾時講。無啦啦自己講好奇怪,好似做新聞咁,所以有咗共識,我哋都冇避忌。其實,我哋喺公司成日食飯,大家開緊工,但係隔籬廠,如果心水清都會奇怪,我又丟低我劇組、佢又丟低佢劇組,兩個人食飯,但一直冇乜人問,咪繼續囉,從來都冇避忌。」
能夠達成共識公開關係,相信兩人發展已到穩定階段?他說:「都覺得係幾啱嘅一個人,大家都覺得幾啱去發展,所以先有呢個共識,如果大家好唔明確嘅,當然唔會有呢個共識啦;而大家都覺得係時候,o依家隨時講得喇。加上,我年紀都唔細,我成日都話唔會呃大家,只要到嗰個階段就會講。」

 

《心理追兇Mind Hunter》劇中,馬明飾演臨牀心理學家,而靚湯則飾演他已死去的女友,兩人不時在男方的幻覺中纏綿,激情咀嘴。

 

兩人同步於社交網上載一對情侶公仔合照,相中的獨角獸與小馬公仔貼頭蹺手依偎在一起,狀甚甜蜜。