為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2020 年 06 月 17 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

FinTech實習最搶手

大學生參與暑期實習計劃(Internship),可以提早儲備工作經驗。又同大家講下舊時,我由中五開始做暑期工,主要係幫人補習,另外我見到恒生銀行有個見習生計劃,淨係上堂冇實質工作,當時本住學習心態參加,估唔到大學畢業後真係入咗銀行工作。
今年疫情影響下,公司提供實習職位面對一定困難。好似金融業,由華爾街到香港,各大銀行都作出相應調整,有銀行延遲開始日期,亦有將實習期由十星期縮至五星期。另外大摩率先推出全「虛擬實習」計劃(Virtual Internships),有銀行就為計劃加入遙距元素,希望繼續提供實習機會畀同學。
香港都有企業推虛擬實習,例如新世界集團(0017)今年招募一百位同學參加虛擬實習計劃,要求實習生透過網絡和視訊會議接受培訓,以及彙報工作。實際上,日後「隨時隨地工作」(Work from Anywhere)將成為趨勢,同學提早掌握新工作模式都好有幫助。
經濟前景不明朗令畢業同學擔心搵工難,但我早排見到老友龐寶林(Paul),佢同我講有一個行業一定唔需要擔心出路,就係金融科技(FinTech)。Paul本身係基金界前輩,一直推動香港FinTech發展,二○一七年仲同一班朋友創立非牟利嘅亞洲金融科技師學會(IFTA)。佢剛剛出席完標保(BIBO) 金融科技實習計劃資訊會,與同學分享金融科技師嘅前景。

FinTech實習計劃受歡迎,反映年輕人就業取態。

 


標保係應收帳管理公司,已經創立二十年,為銀行、金融企業、公用機構等服務。我對呢個行業認識唔深,所以早前搵咗公司主席黃鏡興(Ken)和CEO李家明為我講解。今次公司推出金融科技實習計劃,一方面可以推動行業科技化,另一方面亦可令年輕人多加了解,FinTech應用非常廣泛,唔好以為淨係適用於銀行。
例如標保根據營運經驗和需要,運用FinTech和大數據分析,分辦追收帳項嘅難度,從而分配資源,提高成功率。另外公司通過語音識別系統將前線員工同客戶嘅對話轉成文字,確保通過合規要求。未用人工智能(AI)前公司用人手覆核,只能處理百分之五嘅資料,利用AI檢測敏感詞語,就可以有效識別需要跟進嘅個案。
出席面試嘅同學來自不同學科,Paul解釋本地大學都係近年至有FinTech主修科,因此唔一定本科出身至可以入行,好似佢自己係電子工程出身,標保主席Ken係經濟系畢業、CEO家明主修統計,負責統籌嘅CMO張啟文(Keith)就係社工專業。FinTech除咗要識編寫演算法,仲要能夠落地應用至真正發揮作用,當然Paul亦不忘推介IFTA課程,可以畀不同背景人士取得認證。標保作為創會會員,亦有贊助員工進修。
主打FinTech嘅實習職位並唔多,標保透過大學招募,短時間內就收到成百個申請,可見同學熱衷於進入行業。呢項實習為期兩個月,同學要揀選範疇進行研究,最後要提交報告,完成後可獲實習津貼。公司更表明歡迎實習生提出任何建議,會認真考慮甚至採納意見。目前公司正研究可否採用聊天機械人,網上解答基本及重複查詢,講到Chatbot,原來好多同學都有涉獵,話唔定日後可以幫標保完成呢個計劃。