興趣或者不可當飯食，但對九巴後人雷兆光（James）來說，要將愛好轉化成事業，卻是有能力兼有實力。與太太雷林靜怡（Jane）育有三名子女的他，向來百足咁多爪，近年他淡出九巴業務，自己開製作公司，將以往的「玩具」變成生財工具，更不時父子檔一齊拍片，默契十足。
「嗰時Roadshow開台，所有主題曲係我作o架，我好鍾意創作，但由細到大，都唔可以用呢個興趣嚟搵食，所以先會鮮為人知。」
仔大女大，雷兆光說現在才開始有時間實現理想，不過幾忙都好，都會抽時間陪仔女，一家人下廚煮幾味，他笑言︰「生三個有好處，有時唔得閒，是但都搵到一個幫手！」
聽着這位貪玩爸爸高歌〈海闊天空〉，「背棄了理想，誰人都可以，那會怕有一天只你共我」。沒有不覊放縱，但雷兆光一樣可以自由尋夢。

雷兆光一家都鍾意音樂藝術，玩得的他，得閒就跟三名子女一齊夾Band Jam歌。

情 迷 黑 膠

訪問這天，甫踏進雷家大宅，已聽到一陣陣悅耳的音樂聲，原來雷兆光正在聽黑膠唱片。「以前o靚仔嗰陣，我有夾Band、打碟，不過好多年無聽黑膠嘞，最近先買番唱盤，研究唱盤啲聲，睇YouTube都有晒資料！」
自言五歲已發夢做音樂指揮家的他，形容自己是一個「有牌嘅音樂工程師」。談起音樂，這位爸爸更是眉飛色舞，拿起寶貝逐件介紹︰「我買齊架生，要保養黑膠唔難。」
正所謂有其父必有其子，他的大仔Jeremey今年十八歲，同樣無歌不歡，「阿仔五歲時，我送咗部iPod俾佢，入晒七、八十年代啲英文歌，佢由細聽到大！」
說起音樂，Jeremey跟父親一樣，都是滔滔不絕，經典組合如ABBA、Pet Shop Boys、Duran Duran，都是兩父子的至愛。記者問Jeremey可喜歡Beatles，他口直心快道︰「呢個一般啦！」爸爸便笑笑口插嘴︰「因為我少聽，我鍾意電子音樂多啲！」果然是父子同心，連聽歌喜好也相同。
本身有兩個妹妹的雷兆光稱，現其子及兩個女兒Jacqueline（十五歲）、Jamie（十三歲）都開始踏入青春期，他稱三個都算聽話，但坦言「未管完、未教完」。「好似哥哥想考車牌，我同太太同一陣線，想佢大啲先，因為覺得佢未Ready，兩個女就仲細，平日都係玩吓手機；阿仔間中會同朋友仔飲嘢，如果咁嘅空間都唔俾佢哋，佢哋會好辛苦，呢啲位我會放鬆啲！」

連雷林靜怡的父親都有客串下廚，兩公孫一齊炒蘑菇。

一家人健健康康，是雷兆光與太太雷林靜怡的最大願望。