為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2020 年 06 月 10 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

大封鎖與宅經濟

國際貨幣基金組織四月份發表世界經濟展望,指新冠病毒引起嘅衰退將令今年全球經濟收縮百分之三,並對各項社交距離和封城措施命名為「全球大封鎖」(The Great Lockdown)。IMF對中、美兩國二○二○年經濟展望,分別為中國增長百分之一點二(一九年為百分之六點一),以及美國負百分之五點九(一九年增長百分之二點三)。至於美國出現廣泛反種族歧視示威,會否進一步影響經濟則仍為未知之數。
大封鎖對於旅遊、客運、實體零售、餐飲娛樂、酒店、體育賽事等需要「外出」嘅行業打擊最大。以航空業為例,國泰和港龍三月合共載客三十一萬人次,按年跌九成,並估計四月日均載客量少於一千人,仲少過一列港鐵八卡車載客量。內地航空公司國航、海航、東方航空、南方航空等,首季全部按年盈轉虧。

疫情下刺激宅經濟高速增長,今年首季阿里巴巴電商業務收入增四成七,宅購潛力驚人。

 


全民宅在家,令好多經濟活動停頓,但同時加速「宅經濟」(Stay-at-Home Economy) 發展。單講購物,今年頭兩個月,內地全國零售銷售跌逾兩成,但網上銷售就按年升百分之三至人民幣一萬一千億元,佔總體零售逾兩成一,佔比爬升兩個百分點。內地網購並非始於今次疫情,淘寶網和京東商城分別在○三和○四年建立,可以話由沙士開始,今年首季阿里巴巴電商業務收入增四成七,京東淨收入升兩成一,宅購潛力驚人。
另外我見到報道,疫情下中國全國一、二月稅收跌近一成,但最近來港招股上市嘅網易,以及互聯網巨企阿里巴巴嘅大本營浙江省,首兩月稅收升百分之二點八,係全國唯一錄得稅收正增長嘅省份,相信同當地數字經濟貢獻有關。早排同神州控股(0861)管理層傾偈,講到各省市政府紛紛投資新基建,以建立當地數字經濟,其中一個原因亦係見到當中稅收潛力,希望可以截到部分交易量從而受惠。
美國宅經濟同樣顯著擴張,亞馬遜由於需求急增,三月中起增聘十七萬五千臨時工,最近並指有意將其中七成人轉為長工。另一間科技公司Instacart,透過app在美加提供即日雜貨送遞服務,等大家可以唔使親身去超市。疫情後每星期銷售飆升十倍,喺較早爆發病毒嘅加州和華盛頓州,銷售更升廿倍。雜貨送遞apps如Instacart和Walmart Grocery等,由二月中至三月中下載量以倍數上升。同期,專做餐廳訂檯嘅網上平台OpenTable就按年下跌四成二。
至於宅娛樂,現時在家收看節目以串流和有線為主,其中串流平台漸佔上風,上年全球串流平台訂戶共六億一千萬,首次超越有線台訂戶。近月Netflix訂戶爆升,連新加入競爭嘅Disney+由二月起訂戶亦增加七成五,至五月付費訂戶已超過五千萬。內地提供遊戲和娛樂嘅科企,如騰訊和字節跳動(抖音)等,同樣錄得使用量增長。
宅經濟亦包括遙距工作和會議所帶動嘅新需求,除網上視像外,影響所及,連帶寫字樓和共享工作間亦被波及。有公司已公布將在家工作恆常化,員工可自行決定日後是否繼續遙距返工。呢個新常態之下,對成個商業生態有咩影響?有機會再細談。