出道八年的于淼，繼在一五年《萬千星輝賀台慶》中贏得一百萬獎金獎品，一鳴驚人後；早前，她在無綫劇《多功能老婆》中，成功演活霸氣凌人的「最強小三」顏成功，睇得觀眾咬牙切齒，拍案叫絕，更有份角逐台慶頒獎禮的「最佳女配角」。
事實上，外表柔弱，說話溫婉，感覺內向怕事的于淼，出生自內蒙古，一一年當選《大連小姐》冠軍，翌年來港參加《國際中華小姐》，雖然落敗卻換來一紙藝員合約。她為圓演員夢，縱使在港一個親人都冇，更連一句廣東話都不識講，也要獨自留港發展。事隔七年，經過不斷的努力，她已能操流利廣東話，亦有自己的社交圈；其百分百的堅毅及決心，絕非一般人能及。「啱啱入行時，我係任國語主持，由於我想爭取時間學廣東話，所以其他人講啲八卦嘢，我唔參與，佢哋就覺得我『唔易相處，難溝通』。雖然我好多時唔講嘢，但當啲人蝦我時，我係會出聲。」
道不同不相為謀，于淼寧願沉默是金，默默耕耘，幸好付出的努力，總有識貨之人賞識。近日，她有份參與新劇《刑事偵緝檔案V》，今輯換上「影后」兼「視后」惠英紅和「金像獎男配角」姜皓文孭飛，她未拍先興奮︰「我好期待可以同小紅姐拍劇，希望同佢有對手戲，之前有睇過佢嗰套《血觀音》，佢演技好好！」縱使未知角色，但她閒時除了跑步，又跟楊盼盼學打功夫，苦練靈活身手，到時做兵做賊，都一樣應付自如！

 

大學畢業後的于淼，一二年代表大連來港參加《國際中華小姐競選》，因緣際會下而留港發展。

Profile:

姓名︰于淼（Maggie）
年齡︰32歲
身高︰172cm
三圍︰34D、24、35
學歷︰大連民族大學國際商學院國際貿易專業系畢業
入行︰一一年當選《2011年大連小姐競選》冠軍，翌年代表大連參加《2012國際中華小姐競選》，雖然落敗卻獲無綫簽約旗下。
曾拍攝劇集及電影︰《愛．回家》、《多功能老婆》、《大醬園》、《愛美麗狂想曲》（未出街）等。

于淼在《多功能老婆》中，明搶楊千嬅的老公，又當面奚落對方，演技大躍進；她感恩總監陳寶華找她演出。