為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2020 年 05 月 28 日

蔡堅教父Look回歸 爭醫學會話事權

做過醫學會四屆會長嘅蔡堅再次披甲上陣,出戰醫學會會長選舉,佢率領嘅十二人競選名單近日曝光。除蔡堅外,仲有競逐連任嘅副會長鄭志文,其餘人馬有「黃醫」亦有「藍底」醫生。有醫生給本刊看「蔡營」廣發畀會員嘅競選海報,指有點殺氣騰騰。相中嘅蔡堅着上西裝、戴上鮮黃口罩,蹺腳坐喺正中央;十一名候選人就帶上鮮艷口罩圍站兩旁,令蔡睇落似電影中的教父多過醫生。
蔡堅今次話明因為不滿現屆醫學會處事作風而回歸,如今戴埋黃口罩表態,戰鬥味濃。佢搵咗幾位「素人」競逐會董,包括前綫醫生聯盟副主席陳子泰,以及曾以「真普選醫生聯盟」參選醫學界特首選委嘅覃天笙等。其中陳子泰過去不時企出來批評政府,被視為立場「勁黃」。但蔡堅心知只吸「黃票」並唔足夠,於是搵來走中間路線嘅名醫吸票,好似尋求連任會董嘅心臟科專科醫生何鴻光、皮膚科專科醫生陳厚毅,仲有前副會長陳以誠。
呢張「混合」名單是否有力「食全餐」,要選過先知。不過部分醫生對今次政治色彩極濃嘅選舉極度不安,擔心「藍底」醫生及沉默一群最終面臨被「大清洗」。同蔡堅拗手瓜嘅現任會長何仲平都成功組班,過程一波幾折,最終敲定人選包括林哲玄同陳念德,前者尋求連任副會長,而陳就以會董身份競逐副會長。而候選會董名單上包括現任會董龐朝輝、佘達明、陳潔霜及任俊彥,而莊勁怡、侯鈞翔及蔡振興,就係初次參選會董。

被指立場「頗黃」嘅蔡堅(右),今次同副會長林哲玄(左)打對台。

 

籌組名單暗戰連場

雙方嘅參選名單雖已揭盅,但籌組過程暗戰連場。蔡堅同何仲平陣營月前四出招兵買馬,一直同何仲平老友到極嘅公共醫療醫生協會前會長麥肇敬率先被挖角。麥醫生過去不時協助政府推動戒毒工作,但今次卻選擇投向「蔡營」,並競逐副會長。
被視為「何營」人馬嘅現任義務秘書楊協和醫生亦出現喺蔡營名單上,到底係理念唔同還是另有內情?消息人士透露,有人起初的確支持「何營」,仲加入籌備參選嘅WhatsApp群組,但兩周前「忽然消失」;亦有人起初同「何營」隊友傾緊組班,及後被發現原來已答應加盟「蔡營」,一度掀起「食兩家茶禮」疑雲,當事人隨後退出,難怪有醫生慨歎:「今次選舉真係人性大考驗!」

何仲平發出參選宣言,強調內閣深信必須凝聚成員,化解紛爭,「會盡力確保成員之間求同存異。」

 

戰鬥格十足嘅蔡堅(中)戴上鮮黃口罩,與十一名參選醫生影咗張搞鬼海報。