這五個月，你大概體會到，人生可以離奇過做戲。
劇情是喜？是悲？驚慄？懸疑？六十八歲的謝雪心，以人生經驗話你知，不論戲種，笑，是藝術，也是智慧。舞台上，她既是花旦也當過文武生；轉到電視圈，這十年她則多以氣勢逼人的角色入屋，跟鏡頭後語調溫柔的她，對比強烈。
「我唔識計數，只係想去行自己想行嘅路。拜兩位恩師（任劍輝、白雪仙）門下，劇團開始紅就去結婚；等到生埋BB，就離開咗劇戲行六年，到復出嘅時候，我先知自己嫁咗唔做，係令師父幾咁傷心。」
說到令師父傷心處，一直笑意盈盈的謝雪心，眼泛淚光；談到《降魔的2.0》的「兒子」胡鴻鈞受傷，她則一臉緊張。「真係嚇死o架！當知道『豪仔』（胡於劇中之名）送咗入醫院，我好擔心，但都要收拾心情，因為仲開緊工。但嗰種惶恐，同佢媽媽冇分別。」
漫漫人生路，又豈會得一款戲種？每一集也新鮮，沒有劇情預告，才是最引人入勝之處。

 

於《降魔的2.0》中跟兩名「囝囝」再續前緣，戲外謝雪心跟他們也建立出真感情。

感情戲要真感情

說《降魔的2.0》，謝雪心不只揣摩角色，連造型她也照顧到。「我嘅角色係一個迷信嘅小女人，所以喺第一季我就提議，俾個角色戴一排七個嘅佛牌，通常都係男人戴嘅，但咁樣更加凸顯到呢個角色。」
劇情奇幻，拍攝時，飾演她其中一名兒子的胡鴻鈞，更因工受傷。「當我知道『豪仔』入咗醫院，真係嚇死！嗰種惶恐同緊張，同佢真正嘅媽媽冇分別。我同佢有母子感情戲，係要放真感情落去，所以啲人咪話要抽離角色。
「『豪仔』好細心，佢知我鍾意飲咖啡，好多時冬天出外景，佢都會俾杯暖笠笠嘅咖啡俾我飲，俾驚喜我。佢住院時，我都俾驚喜佢，包到冚去探佢，但佢都認得我喎！當時醫生巡房，我企喺佢媽咪後面，佢屋企人唔該醫生，我都一齊講，好似佢真係我個仔咁。」
七歲便演出第一部電影，一眨眼便六十年，除了付出真感情，謝雪心還曾低調地，滿足自己一個心願。「我細個睇書，好鍾意南丁格爾，『我的志願』曾經係做護士。大個都有試過去養和考護士，但係一磅重就唔合格！我太輕，唔夠秤人哋都唔收，不過我都滿足咗自己。」

謝雪心視任白兩位恩師如雙親。

對女兒珈潁無限量支持，也讚不絕口，都說兒女在父母眼中，永遠如珠如寶。

七歲便演出電影《七小福》，謝雪心（中）因而踏上銀色旅途。