為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 名人薈  > 名人專訪 2020 年 05 月 21 日

鉦益求精 何國鉦

戴口罩戴了近半年,難免沉悶,本地著名時裝設計師何國鉦(Dorian Ho),最近就搞搞新意思,設計了一批時尚口罩,乘機吸引一班愛靚又愛命的潮人。
「主要係身邊貪靚朋友多,佢哋對靚口罩好渴求,初時就整少少俾佢哋,點知個個一見到就癲晒,先至諗住搞大佢!」做事一向精益求精的他,從口罩物料、設計、揀拼布花款,他都親力親為,確保出品質素。
受疫情影響,Dorian坦言過往幾個月,其時裝設計生意幾乎完全停頓,幸好他與弟弟的網上市場策劃公司,生意不錯,總算支持到日常開支,「有朋友問我係咪唔做時裝,我話一定唔係,造衫係我終身興趣,係唔會停嘅,只係經歷呢次疫情,令我覺得開多瓣無壞啫!」
人生生機處處,要不停開拓新路線,才能找到新機會。

Dorian透露,稍後會跟慈善團體合作,推廣其新設計,希望為大家帶來正能量。

 

何國鉦特別換上格仔褸,配襯格仔紋口罩,型格十足。

 

為興趣而做

談起設計口罩,何國鉦表示,初心只為朋友而做,能夠發展成生意都是機遇。「事緣係好多朋友成日話戴外科口罩唔夠靚,問我有無靚口罩俾佢哋襯衫,咁我咪用啲布頭布尾,試車咗幾款。開始時諗住淨係俾朋友用,後來放啲相上網,世界各地都有人短訊我,話想同我買,後來先知道咁有市場,尤其係外國人,佢哋反應好踴躍。」
口罩設計分男女裝,再分返工款和華麗款,後者比較適合去派對,型格一點。他親自挑選幾款給記者拍照,更特別換上兩套衫來示範,發揮貪靚本色。今次自家設計的口罩大受歡迎,他坦言是始料不及,直至四月份,他才考慮大量生產。
「因為無諗過賣得咁好,我成日話咁遲先做,係水尾啦,但好多朋友話,嚟緊一大段時間都會戴口罩喎,既然係咁,我又試下做囉。初初見到陳嘉桓同佢媽咪喺屋企日日車口罩,我仲覺得好搞笑,o依家自己做至知道工夫多。老實講,一個口罩咁少布,仲要用咁多拼布、顏色做花款,真係無咩錢賺,我定價唔貴,又唔係為錢,完全係興趣為主。」
說到賺錢,Dorian大嘆過去半年,其時裝設計收入暴跌九成,他慶幸幾年前跟弟弟搞網上市場策劃公司,近月生意不俗,成為收入支柱,「疫情下人人轉晒做網上營銷,o依家叫做殺出一條血路,尤其係啲婚宴、派對停晒,無客做新衫,就算做咗衫,都唔會嚟試,如果無開呢間公司,我估呢段時間我真係食穀種!」

 

男士款式分為兩大系列,包括棉質布料的返工款(上、$198/個),及織錦布料的華麗款(下、$298/個)。

 

他說小小一塊布口罩,用上多種拼布製作,很費工夫。