為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2020 年 05 月 21 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

阿旦演活人生不同角色

我趁電台節目啟播廿年,搵咗鄭丹瑞(阿旦)分享過去幾十年事業生涯點滴,佢由廣播人到電台高層、做到藝人、電影導演和監製、製作人、導師、校長,到疫情爆發後成立「健康.旦」,可謂多姿多采。
我加入電台時阿旦係高層,一人之下萬人之上,但佢反思人生路向時,發覺自己唔鍾意,甚至唔識做管理層。阿旦曾經係藝人,心態同管理層好唔同,當時覺得兩者平衡唔到。再加上佢坐唔定,仲自爆雖然坐房內好似好忙,其實係睇緊啲唔太相關嘅嘢,覺得對電台冇大貢獻。當時佢喺外面兼職做電影監製,同陳可辛及黃真真合作《見鬼》和《分手說愛你》等電影製作,發現自己好享受做監製,所以在二○○三年沙士後離開商台,集中火力拍電影。
無論幕前幕後阿旦都做過,覺得做監製最開心,因為身邊有好多好叻嘅人,亦可以同新人合作,更有化學作用。彭氏兄弟和黃真真返港拍嘅第一部戲都係由阿旦做監製。後來電視台邀請佢去教年輕人演戲,佢就膽粗粗去做藝員訓練班校長,嘗試電影之外嘅工作,之後更獲邀參與《風雲》音樂劇製作。
作為監製,阿旦話拍一部電影需要至少一至兩年籌備,中間時間佢會用嚟教學。教咗幾年藝員訓練班後,仲衝出香港在內地和海外執教。初時阿旦只係周末飛,為工作坊執教,後來有人邀請佢教一整個月,三思後覺得太頻撲,於是就諗有冇辦法可以冇咁辛苦。

人生不同階段,阿旦演活不同角色, 最近更成為網紅。

 


阿旦靈機一動,諗到網上教學,進行資料搜集後發覺當時市場冇呢類型教學方式,最接近嘅Master Class雖然都係網上授課,但導師係奥斯卡影帝影后,門檻太高,而且上堂單向,冇互動機會,於是佢首創網上演技訓練應用程式Show 8。
Show 8喺網上收生及授課,唔受時間地域限制。學生需要喺上課後兩日內拍片完成功課,之後會收到導師意見,可以從中學習及改善。學生提交嘅功課更有機會喺唔同平台播出,包括MyTV SUPER,有機會提升知名度,增加簽約機會。其中一次學生模仿佘詩曼,阿旦仲搵咗阿佘親自點評。
阿旦今年做埋YouTuber,開創「健康.旦」頻道。阿旦指開設平台係因為見到疫情爆發,坊間太多真假訊息,於是想請專家幫忙澄清謠言,發放正確訊息,仲搵埋大數據專家羅燦和金牌製作人蕭潮順合作。
「健康.旦」已有逾十萬人訂閱,但阿旦拍資訊短片係免費播放,要由佢貼錢製作。不過頻道出咗名,已有人開始搵佢傾合作。頻道會以健康為核心,相信可以同健康講座及產品合作,目前仍在探索業務模式。除健康資訊外,佢最近舉辦許冠傑和郭富城網上演唱會,就為香港人在疫情中帶來娛樂和正能量。一直以來,無論阿旦擔當乜嘢角色,總係能夠為我哋帶來正能量,我祝「健康.旦」熱爆網絡!