為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2020 年 05 月 14 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

一份空白合約換精采廿年

今年五一咁啱四日連假,打工仔唔可以出外旅遊都可以放鬆吓。今年「五.一」對我嚟講意義非凡,因為係電台節目《人生交叉盤》啟播二十年,我特別借呢個欄多謝俞琤、楊振耀(阿楊)和鄭丹瑞(阿旦)幾位伯樂。阿楊和阿旦在二○○○年嚟搵我傾開咪,令我有機會同聽眾朋友分享交流投資心得,當然,最重要嘅伯樂係聽眾,非常感恩得到佢哋廿年以來嘅捧場。
○○年科技未係咁普及,未去到「事事上網」,電台係接收外界信息嘅主要媒體。當時商台節目調動,行政總裁俞琤問阿楊有咩諗頭?阿楊見電台有報道股市新聞環節,但冇股票節目,於是提出下午開市後增設講股時段。偏偏俞琤同阿楊都唔識股市,但阿楊知道坊間有位「世界Friend」叫陳永陸,好多人搵佢問股票,而當時圈中已傳聞佢打算換新環境,就推薦我畀俞琤,期望電台會打開新聽眾層甚至引入新生意。雖然俞琤嗰陣唔識我,聽到阿楊力薦,佢都贊成邀請我加入,仲畀咗一份空白合約阿楊,叫佢同我傾。

陸叔趁《人生交叉盤》啟播二十年,與鄭丹瑞(上圖左)和楊振耀(下圖左)敍舊話當年。

 


證券行工作好忙,可以話係分秒必爭,加上我準備離職,要交代手頭事宜,忙上加忙。當時每日好多媒體上嚟寫字樓搵我訪問、錄音或錄影,人來人往,我就喺寫字樓趁空檔期間同阿楊間間續續咁傾。阿楊邀請我加入電台開股票節目,可以滿足我所有要求,只有一個條件,就係第一年要商台獨家,唔可以上其他媒體。要推晒所有朋友及媒體邀請,呢一個難題令我掙扎咗好耐,因為我好珍惜和不同傳媒朋友嘅關係。
其實當時另一間電台亦開咗個offer畀我,而且地方正正喺我新租用公司樓下,錄音或直播都比較方便。但阿楊誠意十足,喺我考慮三日期間,佢日日準時兩點坐喺寫字樓等我答覆。最終我畀阿楊誠意打動,正式接受商台邀請,但考慮到節目會邀請金融界朋友做訪問,我再提出要求,希望電台將直播地點搬到我中環辦公室,佢第二日應承我,於是正式動筆簽約。
最近我邀請呢兩位伯樂上節目敍舊,先知道原來阿楊當時喺電台有直播節目,佢特登向電台告假三日,上我寫字樓等我答覆。阿旦亦話自己在背後推動,當時送咗「志在必得」四個字畀阿楊,仲笑言請唔到陸叔唔好返嚟。
阿楊一直覺得電台需要開設講股節目,做教育工作和分享資訊,而唔係淨係問「冧把」,因為總有事情係預見唔到,但理財知識最必要。阿旦就認為節目主持最緊要真材實料、一槌定音。廿年匆匆過,《人生交叉盤》每個周日下晝兩點到三點準時開咪,希望不負幾位伯樂期望。
廿年以來,我好享受開咪每一刻。我同聽眾一齊渡過好多市場風浪,最近新冠病毒疫情之下,可能好多投資者都唔敢貿然入市,但理財總有需要,方法亦好多,我期望同聽眾繼續講股談心。