為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2020 年 05 月 05 日

為停工樂手籌錢歌手冇反應 周啟生狂呻:真係好契弟

政府延長「禁聚令」至本月7日,夾Band出身的音樂人周啟生眼見夜場及演唱會等喺疫情下要關閉及停開,多年嚟跟他合作無間嘅職業樂師,全部都手停口停,身陷絕境,有情有義的周啟生即發起「愛港@你+我」網上音樂會幫等錢開飯嘅職業樂師搵救命錢,但好多和樂師唇齒相依嘅歌手們對音樂會反應冷淡,有歌手更已讀不回,周啟生慨嘆世態炎涼,更指歌手們:「愈發財愈唔立品,唉,真係好契弟。」

周啟生是顧家輝入室愛徒,縱橫樂壇46年,跟好多殿堂級歌星如已故張國榮、陳百強、鄧麗君,還有徐小鳳、許冠傑及林子祥等合作。他解釋今次力撐音樂界,全因幾十年嚟自己算係個幸運兒,可以靠音樂賺到錢養家:「我唔算發達,只係過住啲開心同簡單生活,亦都唔敢同人比較邊個巴閉,愈巴閉愈忘恩負義,我唔想做嗰啲人,我覺得要回餽社會,推動音樂事業。」

出錢出力 周啟生見唔少職業樂手手停口停,連交租都成問題,生活好拮据,所以籌劃呢個「救命行動」。

 

倒貼力撐絕境樂手

所以周啟生決定喺6月1日,即他59歲生日當天,舉行「愛港@你+我」網上音樂會籌錢,目標籌得愈多愈好:「最怕欲加之罪,必須講清楚,呢個唔係叫音樂會,係救命行動,所有救命錢會全數派晒出去,我一毫子都唔會賺,甚至會貼錢出嚟,因為所有使費由我獨力承擔,希望每位樂師能夠派到5000蚊應急,等佢哋撐住先,捱到政府派嗰一萬蚊。」周啟生愈講愈嬲,「喺禁聚令下開唔到Show,政府幫唔到呢班音樂人,靠攞綜援都唔容易。佢哋等錢生活、交租真係好慘,成個人灰晒,以我為例都係冇嘢撈,原先去年11月搞3場演唱會,最後改到3月,家陣仲遙遙無期。」

被迫停工 17年,周啟生喺尖沙咀酒吧做一個可容納600幾觀眾嘅搖滾騷,他慨嘆呢啲熱鬧日子唔知幾時先會再有。

 

Candy阿Paul有義氣

不過籌備過程中,周啟生都好受氣:「我日日好似收陀地咁狂打電話,聯絡生意朋友、fans、歌手、唱片公司老闆、演唱會搞手、電視台高層等。但好難堪同諷刺,因為同樂師關係密切嘅歌手反應好冷淡,唉,無言,只得盧巧音同黃貫中(Paul)有回音,仲捐咗筆過萬嘅可觀金額!」周啟生坦言睇唔過眼:「樂手永遠同歌手伴奏,咁多年立下唔少汗馬功勞,但只得嗰幾千蚊微薄報酬,喺呢班朋友最需要幫助嘅時候,共事嘅人竟然唔願出手!佢哋寧願參加Lady GaGa籌款show,幫美國同世衛籌款,『斗零』都冇擺喺香港度!好彩仲有啲好心人,包括黃百鳴、契爺胡楓、環球唱片董事總經理黃劍濤(Duncan)、環星娛樂老闆張國林、黃龍德會計師事務所出錢撐,而陳龍華做義務監製及拍攝。」

我愛香港唔會放棄

另外,周啟生又不吐不快:「聯絡過程中有啲行內人只係畀手瓜emoji我,叫我加油,避開實際行動;亦有人問長問短:『單嘢仲有邊個嘉賓?喺邊度做?』喂,唔係搞國慶回歸騷呀,係嗌救命行動,佢enjoy演出件事多過係救人。甚至有人會反問我:『咪係send錯訊息?』亦有直接回答:『無興趣』,而唔覆嘅更多的,真係好契弟!而我堅持,就算天塌下,竭盡了力氣,We love Hong kong,你我從未放棄。」