為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 名人薈  > 名人專訪 2020 年 05 月 09 日

留院38日 戰勝新冠 莫華倫:好驚再唱唔到歌!

六十一歲的著名男高音歌唱家莫華倫,早前在紐約感染新冠肺炎,先後在泰國及香港接受治療達三十八天,於四月廿四日終於康復出院。出院時,他興奮得在醫院以雄渾的聲線唱出名曲〈獅子山下〉,以證肺功能依舊。
經歷過人人聞風色變的世紀病毒,莫華倫直言:「打死都無諗過會中招,我又有運動,平時極少感冒,初時都好擔心個肺受影響,好驚再唱唔到歌,好彩照X光片,只係個肺中間有少少花,會自己好番,恢復番。呢個病唔係外面講得咁可怕,我已經康復,最有資格講,o依家生活如常,有晒醫生證明,千祈唔好歧視康復者。」
大病初癒的他,出院後馬上走去沙灘曬太陽、吹海風,還有食燒味、飲靚湯,體會健康是無價。

病癒後的莫華倫精神飽滿,且紅光滿面,出院後他一連兩日到海灘吹吹風,呼吸新鮮空氣。

 

在赤柱餐廳午膳,他慶幸沒有被歧視,「好彩侍應問我食乜?而唔係問我點解會喺度?希望大家唔好歧視康復者。」

 

逗留紐約中招

莫華倫出院後接受本刊的電話訪問,正在看歌劇節目的他聲音雄壯地說:「o依家生活完全正常,我尋日仲去咗海灘,又去咗赤柱餐廳,侍應見到我好客氣,問我:『莫生,想食乜嘢?』,而唔係問我:『點解你喺度o架?』希望大家唔好歧視康復者,我已經好番晒,唔需要隔離,我拎晒醫生證明,入咗落電話度,可以隨時俾人睇。」
面對世紀疫症「新冠肺炎」,人人都聞炎色變,莫華倫也沒有想過自己竟會「緣份到」。他自三月五日離港,到過德國和意大利公幹,期間一直有戴口罩;隨後到美國紐約逗留一星期,順道探望在當地工作的兒子及好友,他估計因此中招,「我一向有戴口罩,只係喺美國無人戴,當地人會歧視戴口罩嘅人,覺得你黐線,分分鐘走埋嚟打你都有份,所以我都無戴。期間有出去食飯同睇百老匯歌劇,現場幾千個觀眾,個個都無戴口罩,o依家諗番起都驚……,三月中應該係潛伏期,我十七號飛到泰國,就開始低燒38.2度,有少少頭痛,但無喉嚨痛、無咳,測試後話我係陽性。平日我極少感冒,體能ok,又經常運動,我一直都無諗到自己會中招。」

他與兒子在紐約多次看歌劇,現場幾千個觀眾都無戴口罩,估計因此而中招。

 

失去味覺嗅覺

當下晴天霹靂的他,被送到Bangplee公立醫院的負壓病房接受中、西藥物治療,但藥物的副作用令他又痾又嘔,毫無食欲,曾一度失去味覺和嗅覺,連飲冬陰功湯都無味,一下子暴瘦了十一磅,他遂向武漢前線的醫生朋友求助,對方告知他其正服用的其中一隻藥,原來副作用極大,需要停服,「我一食就嘔,再咁落去怕唔掂,唔食嘢個人會好虛弱,輕病都變重病。我就聽醫生朋友話,偷偷抽起粒藥,掉落廁所,過咗四日就真係食得番嘢,有個護士Mrs Chonlaphat Beh係馬來西亞華人,佢專誠煲湯、蒸魚煮餸俾我食,人在異鄉住院,得到護士特別照顧,真係好感恩!」
他自言症狀輕微,入院約十日後,病徵已消失,但每天仍要接受一系列的檢查。在異國醫院度過最孤寂的廿六日,他沒有將病況告知家人,因不想他們擔心,「有呢個病要住喺隔離病房,完全唔可以探病。太太喺香港,我唔講,係唔想佢擔心;而我個仔喺美國時同我一齊,但佢無事,佢另一個朋友就同我一齊中招。美國嘅醫生開咗感冒藥,叫佢自己隔離,佢兩星期後一樣自己好番,其實呢個病唔係想像中咁可怕,大部份死亡嘅都係其他併發症引起,我係康復者,最有資格講。」

在香港留醫十一日,上月24日出院,離開病房時護士長為他剪掉住院手帶,他拍下這值得紀念的一刻。

 

他在東區醫院,被安排住在獨立病房,期間不用食藥,純粹隔離,待體內的殘餘病毒排出體外,便可出院。

 

莫華倫在曼谷Bangplee醫院留醫,特別感謝護士Mrs. Chonlaphat Beh 對他細心照顧,又幫他煲湯和煮中國菜,令暴瘦五公斤的他,回復食欲。

 

返港再呈陽性

莫華倫在泰國留院至四月十一日出院,由於不是當地人,住院診金埋單約港幣十萬元。出院後他即時返港,雖然已沒有病徵,但接受測試時,卻再呈陽性反應,十三號被送到東區醫院隔離,並接受心電圖、肺功能等檢查,證實身體並無大礙,醫院專家亦指檢測到的只是殘餘病毒,不具傳染性,故他留院十二日終再出院。
「陰性、陽性對我意義不大,因為係無傳染性,我已經有抗體,呢十二日我都無藥食,純粹隔離,日日驗口水同篤鼻,篤到個鼻最深入嗰度,係有啲難受。嗰時都擔心我住喺傳染病區,要住咁多日無病都變有病,好彩之後安排咗我住單獨病房,每日有屋企人送飯,我就煲吓劇,同喺房度行嚟行去練歌。香港新冠肺炎患者出院時原來一分錢都唔使俾,真係好好,好感謝兩地醫護人員嘅專業同細心耐性。」

莫華倫非常感謝醫護人員連日來的悉心照顧,出院前特別與東區醫院傳染病科副顧問醫生龍國璋合照。

 

慢活享受人生

留院三十八日「重生」的莫華倫,深深感受到健康的可貴,坦言往後日子會放慢工作,慢活享受人生,「以前工作排得密密麻麻,不停飛,兩個月都返唔到屋企,飛到自己都唔知去咗邊個城市,住邊間酒店,幾號房門。我以後工作唔會再接得咁密同咁搏,我係好鍾意做歌劇,但唔係為錢。
「我初初知道中招,都有擔心個肺有事,驚影響唱歌,嗰時諗,如果真係有影響,之後就專注教學工作,好彩無事,哈!我出院之後,一連兩日都去咗沙灘,呼吸清新空氣,要食番啲靚燒味、飲啲靚湯補番;十日之後開始會見吓朋友,但年紀大嗰啲,就唔好見住,我擔當唔起呢個責任,萬一佢染到個病,話我惹到佢就麻煩啦,哈!」

莫華倫是中國三大男高音之一,年前在倫敦演出後獲英女皇接見。

 

他曾參演著名歌劇《杜蘭朵》,在音樂界地位舉足輕重。