為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 絕色寫真館 2020 年 05 月 06 日

猛料Shirley 沈殷怡

原來沈殷怡的父親,為前律政司副刑事檢控專員沈仲平,是法律界的知名人物,所以一早就為女兒鋪好做律師的康莊大道,那知她竟然先斬後奏入娛圈。
「為咗呢件事,爸爸有半年都冇同我講嘢。其實電視台方面,好耐之前已經搵我加入,但我都係決定讀完書,做一年律師樓先。轉行前,我完全冇同屋企人講過,到我真係轉工之前,先至同佢哋講。」
雖然知道父親為這件事不高興,但為了一份理想,沈殷怡還是決定離開家人安排好的路,勇闖真正屬於自己的世界。
「我知道娛樂圈好講運氣,所以我先安排好一條『後路』,再畀自己試五年,就睇吓自己得唔得囉!」
對此沈殷怡其實充滿信心。
「我由細大都好好運!哈哈哈!」

 

 

 

 

 

 

《美女郊遊遊》着三點式行山,讓兩位Shirley﹙沈殷怡(左圖左)和陳欣妍﹚都突然爆紅,也算是現時疫境中的特殊例子。

 

因為着三點式行山做郊遊目,成為近日熱爆紅人的沈殷怡Shirley,不論樣貌、身材、學歷以至家庭背景,都成為談論話題,更因為節目中大膽冇有怕,被稱為勇敢Shirley,但其實要起「花朵」的話,她應該要叫「猛料Shirley」。
沈殷怡中、小學都就讀香港傳統名校,文憑試4科5**,考到全額獎學金升讀上海復旦大學法律系。畢業後,她回港再入中文大學讀法學碩士,論成績、論腦筋,都是勁到冇朋友。
繼而入律師樓做了一年實習律師,卻決定放棄高薪厚職,加入娛樂圈做演員。兩年來名氣與收入都不算高,直到近日的《美女郊遊遊》,人氣才算即時急升,就連家庭背景亦被「起底」。

Shirley不時在網上社交媒體分享個人靚相,近日粉絲人數更是幾何級上升。

 

高貴變麻甩

自小由家人栽培,沈殷怡除學業成績頂級、鋼琴八級、雙簧管也有五級,小時候的課餘活動是去學騎馬,每個周末的家庭活動是到半島酒店飲下午茶,生活聽落極為離地。
「屋企人當然想我做淑女啦,但其實我個人都幾麻甩,好貼地,凌晨拍完嘢收工,我係會同同事們去「地踎」茶餐廳食消夜,完全冇問題,好enjoy!」
而入行初期其實都是主持資訊性節目,拍劇也是演鄭少秋個女,算是保持優雅形象。直到這次美女去行山,才徹底形象大轉變。
家人見到她三點式現身電視,反應又會否大爆發呢?
「拍完,我就知道有『危險』,所以一早同媽咪打定底,講咗會有這一幕,都唔敢同爸爸講。點知媽咪睇完笑住口問我:『你咁拍法,凍唔凍呀?小心冷親喎!』就算,反而會擔心我去做危險動作,例如:跳崖,媽咪就叫我要識拒絕。」
節目出街後,最讓她困擾的,卻是因為被指家境不俗,日日被同事要求請飲茶。
「有錢女?就當係我其中一個身份囉!就算觀眾知道我家人做乜都冇所謂,唔好騷擾佢哋就得啦!最慘係成日畀同事要求我請去半島飲下午茶囉!」
「限聚令」過後,可能Shirley就要搵一日,包場請同事們開餐了。

c╱﹙左起﹚父親沈仲平、母親、Shirley及弟弟一家四口合照。初時父親因為她入娛樂圈而不開心,但現在已經接受。「好彩弟弟也是讀法律,父親有接班人。」

 

沈殷怡自細讀書成績已經極好,復旦大學法律系畢業後,再回港入中大讀法律碩士,學歷絕對係娛樂圈中的頂班。